00:00:00 IGIHE NETWORK KN KINYARWANDA EN ENGLISH FR FRANCAIS

Imibare yerekanye ko Raila Odinga ari we uhabwa amahirwe yo kuyobora Kenya

Yanditswe na IGIHE
Kuya 29 July 2022 saa 04:27
Yasuwe :

Umukandida w’ihuriro Azimio la Umoja, Raila Odinga, akomeje kuza imbere mu bahabwa amahirwe yo kuyobora Kenya, aho ikusanyabitekerezo rimuha amajwi 52 ku ijana.

Uyu mugabo ahabwa amahirwe mu matora ateganyijwe ku wa 9 Kanama. Ashobora kuba perezida wa gatanu wa Kenya, asimbuye Uhuru Kenyatta uyiyobora kuva muri Mata 2013.

Visi Perezida Dr. William Ruto w’Ihuriro Kenya Kwanza aza ku mwanya wa kabiri, ahabwa amahirwe ya 45 ku ijana.

Ni imibare yakusanyijwe n’ikigo Centre for African Progress (CAP), cyashyize umukandida Prof George Wajackoyah wa Roots Party ku mwanya wa gatatu, n’amajwi abiri ku ijana.

Icyo kigo cyashinzwe mu 2013, kivuga ko gikurikirana cyane ibijyanye n’ubukungu ba politiki muri Afurika.

Inyigo yacyo yatangarijwe i Nairobi kuri uyu wa Gatanu, igaragaza ko Odinga ashyigikiwe cyane n’abaturage bo mu bice bya Nyanza, uburengerazuba, amajyaruguru n’iburasirazuba bw’igihugu ndetse na Nairobi.

Ku rundi ruhande, Dr. Ruto we ngo ashyigikiwe cyane mu bice bya Rift no muri Mount Kenya.

Raporo ikomeza iti "Ubabajije umukandida bahitamo amatora aramutse abaye uyu munsi, abasubije benshi bavuze ko bahitamo kandidatire ya Raila Odinga kurusha iya William Ruto. Irindi tsinda rito ryagaragaje George Wajackoyah. Umubare w’abandi bataramenya neza aho bahagaze ugera kuri 2 ku ijana."

Umukandida David Mwaure Waihiga ni we uza inyuma y’abandi.

Mu mashyaka, UDA ya William Ruto ni ryo rikunzwe cyane kuri 40 ku ijana, hagakurikiraho ODM ya Raila Odinga kuri 37 ku ijana.

Ni mu gihe ishyaka Jubilee riri ku butegetsi rifite amanota 12 ku ijana, Wiper ya Kalonzo Musyoka na Kanu ari ku mwanya wa gatatu na kane, aho afite amajwi 3 ku ijana na 1 ku ijana nk’uko akurikirana.

Iyo bigeze mu buryo amahuriro ya politiki akunzwe, Azimio la Umoja riza imbere na 50 ku ijana, naho Kenya Kwanza Alliance rifite 47 ku ijana.

Iri kusanyamibare ryakorewe mu Ntara zose zigize Kenya uko ari 47, hagati ya tariki 15-17 Nyakanga 2022 muri uyu mwaka, habazwa abantu 8,355.

Raila Odinga ni we uza imbere mu bahabwa amahirwe yo kuyobora Kenya
Dr. William Ruto (iburyo) na Raila Odinga (hagati) barahatanira gusimbura Perezida Uhuru Kenyatta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .