Imibare mishya yerekanye ko Ebola yagabanyije umurego muri RDC

Yanditswe na IGIHE
Kuya 17 Ugushyingo 2019 saa 06:44
Yasuwe :
0 0

Inzego z’ubuzima muri Repubulika ya Demokarasi ya Congo n’abayobozi b’Ishami ry’Umuryango w’Abibumbye ryita ku buzima, OMS, bagaragaje ko mu byumweru bishize indwara ya Ebola yagabanutse ku rwego rwo hejuru mu bice bya Kivu y’Amajyaruguru ndetse no mu Ntara bya Ituri, aho imaze igihe yibasiye.

Imibare yashyizwe ahagaragara kuri uyu wa Gatandatu yerekana ko kugeza ku wa Gatanu tariki 15 Ugushyingo 2019, Ebola yari imaze kugaragara ku bantu 3292, barimo 3174 byemejwe ko ari yo, ku bandi 118 bikaba gukeka.

Abo kandi barimo 2195 yahitanye kuva yakongera kugaragara muri RDC, aho igipimo cy’abo iyo ndwara yishe ugereranyije n’abayanduye bose kingana na 67%.

Urebye mu minsi 21 ishize, uduce twa Mabalako, Beni na Mandima nitwo tukigaragaramo Ebola cyane kuko mu bantu 30 yagaragayeho, dufite 47% (14/30), 27% (8/30) na 23% (7/30) nk’uko dukurikirana.

Mu tundi duce iyo ndwara yaragabanutse kuko nk’agace ka Kalunguta kari kamaze igihe kugarijwe na Ebola, kujuje iminsi 21 nta murwayi mushya uhagaragaye. Mu gace ka Katwa nako kari kugarijwe, iminsi ibaye 42 nta murwayi mushya wanduye.

Mu itangazo OMS yasohoye, yavuze ko "uko imibare y’abanduye ikomeza kugabanuka, ari ikimenyetso gitanga icyizere mu kurandura iyi ndwara."

Umubare w’abamaze gukindirwa iyi ndwara nawo ukomeje kuzamuka, ku buryo uhereye muri Kanama umwaka ushize hamaze gukingirwa abantu 252 835.

Uretse abantu basaga 2100 ebola yahitanye kuva ku wa 1 Kanama 2018, abandi 1.070 babashije kuyikira.

Gusa OMS ivuga ko nta mpamvu n’imwe yo kwirara. Ni mu gihe haheruka kuvumburwa urukingo rushya rwa bola, aho ku nshuro ya mbere, muri iki cyumweru OMS yemeje urukingo rwa Ebola mu buryo bw’ibanze, ibimenyetso by’intambwe iganisha ku guhangana n’iyi ndwara yari imaze igihe yica abantu benshi muri RDC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza