Ikigo cyashinzwe na Donald Kaberuka kimaze kugira uruhare rukomeye mu iterambere ry’ibihugu byinshi bya Afurika

Yanditswe na Muhonzire Sylvine
Kuya 24 Gashyantare 2021 saa 08:45
Yasuwe :
0 0

Ikigo ’SouthBridge’ cyashinzwe na Lionel Zinsou afatanyije na Donald Kaberuka, gitanga ubujyanama kuri za guverinoma no ku bikorera muri Afurika ku bijyanye n’ishoramari ndetse n’ubucuruzi, kiri gutanga umusanzu uzana impinduka mu bukungu bw’ibihugu bya Afurika.

Ikigo kigo kimaze imyaka itatu, kimaze kuba nk’impozamarira ku bafite imishinga na za guverinoma, kuko bajyaga bahura n’ikibazo cyo kubona serivisi gitanga bibahenze kubera ko zatangwaga n’ibigo bikomeye ku Isi.

Lionel Zinsou wahoze ari Minisitiri w’Intebe wa Benin, akaba inzobere mu by’ubukungu yabwiye Jeune Afrique ko Southbridge yiteguye gufasha guverinoma zose yaba izifite umusaruro mbumbe ungana na miliyari 2$ cyangwa miliyari 500$.

Ati “Twiteguye gufasha guverinoma zifite GDP ya miliyari 2$ kimwe n’izifite miliyari 500$ ndetse n’imishinga ifite agaciro ka miliyoni 30 kimwe n’ifite miliyari 30.”

Zinsou avuga ko SouthBridge yafashije imishinga na guverinoma nyinshi muri Afurika, by’umwihariko mu 2020 yafashije Ikigega gishinzwe Gutsura Amajyambere muri Djibouti kizakoresha miliyari 1,5 z’amayero mu myaka 10 ndetse itanga ubujyanama kuri Guverinoma ya Togo mu bijyanye n’ubukungu.

Mu myaka itatu gusa iki kigo kimaze gishinzwe, cyasinyishije imishinga igera kuri 30. Uyu si umubare muto kuko uramutse ubigereranyije n’ikigo cyitwa EFG Hermes Frontier, cyatangiye mbere gato ya SouthBridge bitanga serivisi zimwe gikorera muri Kenya no muri Nigeria, usanga cyo kimaze gusinyisha imishinga igera kuri 12 gusa.

Iki kigo gitera imbere ku buryo bugaragara, aho muri iki gihe Isi yari ihanganye na Covid-19, cyasinyishije imishinga igera hafi ku 10. Southbridge yakoranye bya hafi n’ibihugu nka Maroc, Sénégal, Guinée, Mali, Côte d’Ivoire, Nigeria, Cameroun, Congo, u Rwanda ndetse na Tanzania.

Abashinze iki kigo ni inzobere mu by’ubukungu, aho Donald Kaberuka yayoboye Minisiteri y’Imari n’Igenamigambi mu Rwanda imyaka umunani ndetse aba n’Umuyobozi Mukuru wa Banki Nyafurika itsura Amajyambere (BAD).

Lionel Zinsou nawe ni umuhanga mu by’ubukungu, kuko yakoze mu kigo gitanga serivisi nk’iza SouthBridge gikomeye ku Isi cyitwa Rothschild aba n’Umuyobozi Mukuru w’Ikigo gikomeye mu Bufaransa mu by’ubukungu cyitwa PAI.

SouthBridge ifite ibiro i Kigali, Paris mu Bufaransa na Abidjan muri Côte d’Ivoire ndetse irateganya no kwagura imipaka igafungura ibiro i Londres mu Bwongereza ndetse na Johannesburg muri Afurika y’Epfo.

Donald Kabera ashimirwa na benshi uruhare rwe ku bujyanama butangwa n'ikigo yashinze
Lionel Zinsou ni umwe mu bahanga mu bukungu umugabane wa Afurika ufite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .