00:00:00 IGIHE NETWORK KN KINYARWANDA EN ENGLISH FR FRANCAIS

Ihene ziri kurikoroza muri politiki y’u Burundi

Yanditswe na Zigiranyirazo Bajecteur
Kuya 12 April 2022 saa 07:11
Yasuwe :

Leta y’u Burundi imaze iminsi mu gikorwa kitavugwaho rumwe aho iri gutera inkunga amakoperative mu kugura ihene zihabwa abaturage hagamijwe kubashishikariza gukurikira ishyaka riri kubutegetsi, igikorwa bamwe bari gufata nko guhembera amacakubiri mu gihugu.

Inkuru dukesha African Arguments ivuga ko Koperative ya Sangwe ari yo inyuzwamo iyi nkunga ya Leta ku buryo abanyamuryango bayo bakunze kuba bafite ibibazo by’ubushomeri, bahabwa amatungo magufi yo korora bikabafasha kwiteza imbere.

Ku rundi ruhande, amakuru avuga ko kugira ngo ubashe guhabwa iri tungo urigumane bigusaba kuba uri umunyamuryango w’ishyaka riri ku butegetsi rya CNDD-FDD.

Mu buhamya bwatanzwe n’uwitwa Niyongabo Jean ufite imyaka 33, yavuze ko ubwo yaburaga uburyo bwo gukomeza amashuri ye ya Kaminuza i Bujumbura yafashe umwanzuro wo gusubira iwabo i Muhuta mu Majyepfo y’Igihugu aho yari afite igitekerezo cyo gukora ubworozi buciriritse ariko bikamubera ingorabahizi. Nyuma yaje guhabwa ihene ifite agaciro k’ibihumbi 140 by’amafaranga akoreshwa mu Burundi, iyi hene zikaba zari ziturutse muri Koperative ya Sangwe.

Niyongabo avuga ko iyi hene yaje kubyara abana babiri kandi ayitezeho kuzakomeza kumwororokera.

Ku rundi ruhande ariko mu Ntara ya Cibitoke iherereye mu Majyaruguru ashyira Uburengerazuba bw’u Burundi, hari umuturage witwa Nzohabonayo Dieudonné uri mu kigero cy’imyaka 40 na we wari wugarijwe n’ubukene akaza gufata umwanzuro wo kwisunga iyo Koperative ikamuha ingurube. Icyakora nyuma yo kuyishyikirizwa yaje kuyamburwa n’abayobozi b’inzego z’ibanze babarizwa mu Ishyaka rya CNDD-FDD, aho uyu mugabo avuga ko bamusabye kubanza kwiyunga kuri iryo shyaka dore ko asanzwe abarizwa mu ryitwa CODEBU ritavuga rumwe n’ubutegetsi buriho.

Nzohabonayo avuga ko yabwiwe ko ubufasha butangwa na Koperative ya Sangwe bugenewe abanyamuryango b’igihe kirekire ba CNDD-FDD bakunze kwitwa “Ab’indani”; ni ukuvuga ab’imbere mu ishyaka.

Ati “Mu buryo buteguye, Koperative ya Sangwe iharanira inyungu z’abanyamuryango ba CNDD-FDD bonyine.”

Ni inde wungukira muri ibi bikorwa?

Kuva Perezida Evariste Ndayishimiye yatangira inshingano nk’Umukuru w’Igihugu mu myaka ibiri ishize, yakunze gushyira imbere ikijyanye n’iterambere nka kimwe mu by’ibanze agomba kwibandaho nyuma y’aho Igihugu cyari kimaze imyaka itanu mu mvururu n’imidugararo yatangiye mu 2015.

Ndayishimiye yagize ati "intambara yo guharanira amahoro twarayitsinze ubu hakurikiyeho iyo guhashya ubukene. Buri munwa wose ugomba kubona icyo gutamira kandi buri mufuka wose ugomba kubamo amafaranga."

Koperative ya Sangwe ifatwa nk’umuvuno ukoreshwa mu gusohoza ibyo Perezida Ndayishimiye yasezeranyije abaturage ndetse kugeza ubu iyi Koperative imaze kugezwa ku dusozi tugera ku 3200 mu gihugu hose ndetse buri hantu iyi Koperative igeze igenerwa miliyoni 10 z’amafaranga akoreshwa mu Burundi kugira ngo ibashe kuhatangiza ibikorwa byayo.

Izi Koperative za Sangwe zigenda zikwirakwizwa mu gihugu ziri muri politiki ya Leta yo guteza imbere ubuhinzi n’ubworozi nk’inkingi ebyiri ziza ku isonga aho Abarundi bangana na 90% batunzwe n’ibyo bikorwa. Ni mu gihe kandi iyi gahunda yitezweho kugira uruhare mu kugabanya ubushomeri bwibasiye Abarundi ku kigero kiri hejuru ya 55% mu gihe kandi 63% by’abatuye iki gihugu bari munsi y’imyaka 25.

Abasesenguzi n’abakurikiranira hafi politiki y’u Burundi bavuga ko Koperative ya Sangwe ari iturufu iri kwifashishwa n’ubutegetsi mu kwigarurira abaturage aho babishingira ku kuba inama z’iyi Koperative zikunda kubera mu biro n’inyubako z’Ishyaka rya CNDD-FDD kandi zikayoborwa n’abafite aho bahuriye n’iryo shyaka.

Ikindi gishingirwaho ni uko hari abimwa amahirwe yo guhabwa ibigenerwa abanyamuryango ba Sangwe, bahowe ko babarizwa mu yandi mashyaka.

Umuyobozi w’Umuryango Urwanya Ruswa n’Akarengane mu Burundi (OLUCOME) Gabriel Rufyiri, avuga ko Koperative ya Sangwe iri gukora mu buryo butaboneye kuko ibikorwa byayo byakabaye bigera kuri bose nta kuvangura. Ati "Izi koperative ziterwa inkunga na Leta kandi izo nkunga zikomoka mu misoro iba yatanzwe n’abaturage, zikwiye kugirira umumaro buri wese."

Leta y’u Burundi ihakana aya makuru yose ikavuga ko koperative za Sangwe atari umutungo wayo kandi zikora mu nyungu z’abaturage bose.

Harikangwa amacakubiri

Nubwo mu 2020 Perezida Ndayishimiye yatangaje ko igihe cy’umwijima kirangiye mu Burundi nyuma y’igihe cyari gishize abaturage bicwa abandi bagahunga ndetse ibitangazamakuru bimwe bigafungwa, abasesenguzi bavuga ko kudakorera mu mucyo no gushaka gusumbanisha abaturage binyuze muri Koperative za Sangwe, bishobora kuzagira ingaruka zikomeye zirimo amakimbirane akomeye bitewe n’uko bamwe mu baturage bazaba babona badahabwa amahirwe angana n’ay’abandi.

Rufyiri avuga ko niba bashaka guteza imbere Igihugu cyabo bagomba kwirindi ubusumbane mu isaranganywa ry’ubukungu bw’igihugu kandi hakubahirizwa ingingo ya 63 y’Itegekonshinga u Burundi bugenderaho ndetse anagaragaza ko mu gihe Koperative ya Sangwe yakomeza imikorere nk’iyi, byazasenya Igihugu aho kucyubaka.

Harikangwa ko politiki y'Ishyaka CNDD-FDD yo gutanga ihene ku banyamuryango nayo ishobora kurema amacakubiri mu baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .