00:00:00 IGIHE NETWORK KN KINYARWANDA EN ENGLISH FR FRANCAIS

Icyorezo cya Ebola cyagaragaye muri Uganda

Yanditswe na IGIHE
Kuya 20 September 2022 saa 09:38
Yasuwe :

Minisiteri y’Ubuzima muri Uganda, kuri uyu wa Kabiri yemeje ko icyorezo cya Ebola kirimo gukwirakwira mu Karere ka Mubende, nyuma yo guhitana umusore w’imyaka 24.

Minisiteri w’Ubuzima yatangarije kuri Twitter ko uwo musore yabanje kugaragaza ibimenyetso bya Ebola byo kuva amaraso menshi mu mubiri, ndetse aza kwitaba Imana.

Yakomeje iti "Uburwayi bwabonetse mu musore w’imyaka 24 wo mu mudugudu wa Ngabano, mu gace ka Madudu mu Karere ka Mubende, wagaragaje ibimenyetso by’iyindwara nyuma aza gupfa."

Mu kiganiro yagiranye n’abanyamakuru, Umunyamabaga uhoraho muri Minisiteri y’Ubuzima Dr Diana Atwiine, yavuze ko hari abandi bantu batandatu bapfuye muri ako gace muri uku kwezi, nyuma yo kugaragaza "ibimenyetso bidasanzwe."

Harimo gukorwa iperereza ngo hamenyekane niba baba barazize iki cyorezo.

Dr Atwiine ariko yavuze ko igihugu cyiteguye guhangana n’iki cyorezo nk’uko cyabikoze mu bihe byahise.

Ati "Icyiza ni uko buri karere kateguye gahunda yo guhangana n’iki cyorezo, ku buryo ivuriro ribonye umurwayi rikwiye guhita ritanga amakuru ku buyobozi bw’akarere kugira ngo hakorwe iperereza ndetse uwaketsweho ubwandu ashyirwe mu kato."

Ebola yandurira mu matembabuzi ava mu mubiri, ku buryo ishobora gukwirakwira mu gihe umuntu akoze ku wanduye cyangwa mu guhererekanya ibintu byagiyeho ubwandu.

Urwaye Ebola agira umuriro, ababara umutwe, aribwa mu ngingo, mu muhogo, agacika intege, agahitwa, akaruka cyane kandi kenshi. Mu bindi bimenyetso agaragaza harimo kuribwa mu nda no kuva amaraso ahantu hose hari umwenge ku mubiri.

Minisiteri y’ubuzima yemeje ko yasanze icyo cyorezo ari virus ya Ebola ikomoka muri Sudani.

Ishami ry’Umuryango w’Abibumbye ryita ku buzima, ku rwego rwa Afurika, ryavuze ko rikomeje gukurikiranira hafi ubwo bwandu.

Riti "Kugeza ubu hari abantu umunani barimo gukorwaho iperereza ngo hamenyekane niba barwaye Ebola, barimo kwitabwaho mu mavuriro atandukanye."

Minisiteri y’ubuzima yahise yohereza itsinda ry’inzobere mu karere ka Mubende, zo gukurikiranira hafi uburyo bwo guhangana n’iki cyorezo.

Si ubwa mbere Ebola igaragaye muri Uganda, ariko inzego z’ubuzima zagiye zifata ingamba zituma ihashywa. Imaze iminsi igaragara cyane muri Repubulika ya Demokarasi ya Congo.

Umunyamabanga Uhoraho muri Minisiteri y’Ubuzima, Dr Diana Atwiine, aganira n'abanyamakuru kuri uyu wa Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .