Icyo u Rwanda rutekereza ku ibaruwa Perezida Nkurunziza yandikiye Museveni

Yanditswe na HABIMANA James
Kuya 8 Ukuboza 2018 saa 12:38
Yasuwe :
0 0

Perezida w’u Burundi Pierre Nkurunziza yasabye umuhuza mu bibazo by’icyo gihugu, Perezida wa Uganda Yoweri Museveni, gutumiza inama y’abakuru b’ibihugu bya Afurika y’Iburasirazuba, EAC, ngo haganirwe ku bibazo biri mu mubano w’u Burundi n’u Rwanda.

Bibayeho nyuma y’uko ku wa 30 Ugushyingo, u Burundi bwanze kwitabira Inama ya 20 y’abakuru b’ibihugu bigize Umuryango wa Afurika y’Iburasirazuba, EAC, yagombaga kubera i Arusha, mu gihe abandi bayobozi b’ibihugu cyangwa ababahagarariye, bari bageze muri Tanzania.

Mu rwandiko rurerure Perezida Nkurunziza yandikiye Museveni nk’uko BBC yabitangaje, yagiye ashinja u Rwanda kuba inyuma y’ibibazo biri mu Burundi.

Ni ibibazo ariko u Rwanda rwakunze gushimangira ko bituruka mu Burundi imbere, kurusha kuba bwashyira mu majwi umuturanyi wabwo.

Bimwe mu byo Nkurunziza avuga, harimo ibitero bibiri by’abantu bitwaje intwaro avuga ko baturutse mu Rwanda mu kwezi kwa mbere n’ukwa karindwi mu 2015, no guha ubuhungiro abashatse guhirika ubutegetsi bwe mu 2015.

Yanavuze ko basabye ko hashyirwaho itsinda rigenzura ibyo bibazo, u Burundi burabyemera ariko u Rwanda rwanga ko rihagera.

Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango wa Afurika y‘Iburasirazuba, Amb. Nduhungirehe Olivier, yabwiye IGIHE ko ku ruhande rw’u Rwanda iyo nama ntacyo bayitekerezaho.

Yakomeje agira ati “Inama yonyine yatumijwe ni inama isanzwe yo ku itariki ya 27 Ukuboza i Arusha. Niyo u Rwanda ruzitabira.”

Iyi nama ni iy’abakuru b’ibihugu bya EAC, yimuriwe mu mpera z’uku kwezi kugira ngo izabashe guterana ibihugu byose bihari, nyuma y’uko u Burundi bwanze kwitabira iheruka buvuga ko butayiteguye neza.

Mu ibaruwa ye, Perezida Nkurunziza yanavuze ku biganiro bimaze igihe bigamije gushaka amahoro mu Burundi, ashimangira ko adashobora kuganira n’abantu bagerageje kumuhirika ku butegetsi.

Yanagerageje kubihuza n’impamvu u Rwanda rutaganiriye n’Interahamwe.

Kuva u Burundi bwajya mu mvururu zatangiye muri Mata 2015, Perezida Nkurunziza amaze gutangaza ko aziyamamariza manda itaravuzweho rumwe, abayobozi batandukanye mu Burundi bakunze kumvikana bashinja u Rwanda kuba nyirabayazana w’ibibazo byugarije iki gihugu.

Perezida Paul Kagame aheruka kuvuga ko inkomoko y’ibibazo by’Abarundi bakwiriye kuyishakira mu gihugu cyabo aho kuyishakira hanze.

Yagize ati “Icy’ingenzi ku Burundi n’Abarundi ni ugufata ibibazo bafite nk’ibyabo aho gushakira inkomoko yabyo hanze y’igihugu cyabo, cyangwa ko nta kibazo na kimwe bafite mu gihugu cyabo, kandi ndakeka byafasha gukemura ikibazo no gutesha agaciro ibihuha byirirwa bikwirakwizwa.”

Mu bihe bitandukanye, hari n’amakuru yagiye u Burundi mu majwi ku gushyigikira imigambi yo guhungabanya umudendezo w’u Rwanda.

Nyuma y’ibitero byagiye byibasira Amajyepfo y’u Rwanda cyane cyane mu karere ka Nyaruguru, muri Nyakanga Polisi y’u Rwanda yatangaje ko abagabye igitero cyo gusahura abaturage muri ako karere baturutse mu Burundi.

Banyuze mu ishyamba rya Nyungwe riri hagati y’ibihugu byombi, ari na yo nzira baciye basubira mu gihugu cyabo. Icyo gitero cyabaye nyuma y’ikindi mbere ho ibyumweru bibiri, cyahitanye abaturage babiri kigakomeretsa batandatu.

Amb. Nduhungirehe Olivier yavuze ko inama u Burundi busaba ntacyo u Rwanda ruyitekerezaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza