Ibyo Afurika ikwiye gukora kugira ngo isoko rusange rigere ku ntego

Yanditswe na IGIHE
Kuya 18 Ukwakira 2019 saa 06:05
Yasuwe :
0 0

Amezi hafi atanu agiye gushira hatangiye kubahirizwa amasezerano ashyiraho isoko rusange rya Afurika, AfCFTA, nyuma y’uko ibihugu 22 biyemeje burundu nk’uko byasabwaga.

Itangira ry’iri soko ryafashwe nk’umunsi w’amateka muri Afurika kuko yatangiye urugendo rwo kwishyira hamwe no guharanira uburumbuke budaheza.

Ikigega Mpuzamahanga cy’Imari (FMI) na Banki y’Isi byashishikarije ibihugu byo ku mugabane wa Afurika gukemura imbogamizi zigihari mu ishyirwa mu bikorwa ry’amasezerano y’isoko rusange, rizaba ari rinini ku Isi.

Umuyobozi wa FMI, Kristalina Georgieva, mu kiganiro n’abanyamakuru cyabereye i Washington kuri uyu wa Kane, yavuze ko amasezerano y’isoko rusange ari intambwe y’ingenzi kuri Afurika.

Ati “Kugira ngo ashyirwe mu bikorwa, ni ngombwa cyane ko ibihugu birenga imipaka yabyo bigatekereza uko byakorana kugira ngo urujya n’uruza rw’abantu rworohe kuruta uko bimeze uyu munsi muri Afurika”.

Nubwo iri soko rusange bigaragara ko ritarimo koroherwa na politiki y’ubukungu ya Trump, FMI igira inama Afurika yo kubyaza umusaruro amahirwe y’ubucuruzi ayirimo ikuraho imbogamizi zishingiye ku misoro n’izidashingiye ku misoro bityo iteze imbere ubukungu mu turere n’ubucuruzi hagati yatwo.

Georgieva ati “Muri FMI dushobora gufasha ibihugu bya Afurika gushyiraho politiki zo guteza imbere ubukungu, izigabanya ruswa aho iri ndetse no gushyira amafaranga mu ishoramari ry’ingenzi muri Afurika, nko mu burezi n’ibikorwa remezo”.

Perezida wa Banki y’Isi, David Malpass, avuga ko ukwiyemeza kw’ibihugu kuzaba ingenzi mu gushyira mu bikorwa amasezerano y’isoko rusange no kuyabyaza inyungu nyinshi mu bucuruzi.

Aya masezerano ashobora kuzakurura ishoramari ryinshi ryo hanze ya Afurika, ndetse no kongera gukora no guhererekana ibicuruzwa mu karere ari nabyo moteri y’iterambere mu bindi bice by’Isi.

Malpass ati “Guhuza ibijyanye n’imisoro, gasutamo ndetse n’ibikenerwa ku mipaka kugira ngo ibicuruzwa byambuke nta gukererwa ni bimwe mu by’ingenzi kugira ngo amasezerano y’ubucuruzi muri Afurika agerweho neza”.

Isoko rusange rya Afurika mu buryo budasubirwaho ryatangiye muri Nyakanga i Niamey muri Niger, ku ntego y’uko rizaba ryatangiye gukora neza kuwa 1 Nyakanga 2020. Uretse Erythree, ibindi bihugu byasinye amasezerano arishyiraho mu gihe 27 yayemeje burundu.

Muri Werurwe umwaka ushize nibwo i Kigali mu nama y’Umuryango wa Afurika Yunze Ubumwe ibihugu 44 byasinye amasezerano yoroshya urujya n’uruza rw’abantu n’ibicuruzwa muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza