Ibindi biganiro ku iyubakwa ry’urugomero ku ruzi rwa Nile muri Ethiopia byasojwe ntacyo bigezeho

Yanditswe na Uwimana Abraham
Kuya 14 Mutarama 2021 saa 10:32
Yasuwe :
0 0

Ibiganiro byahuzaga Ethiopia, Sudani na Misiri ku iyubakwa ry’urugomero ku ruzi rwa Nile muri Ethiopia, byarangiye ntacyo bitanze nyuma y’uko ibi bihugu bitumvikanye ku ruhare rw’impuguke z’Umuryango wa Afurika Yunze Ubumwe muri uyu mushinga.

Mu mpera z’icyumweru gishize ibi bihugu byasubukuye ibiganiro kw’iyubakwa ry’uru rugomero mu mushinga wa Grand Ethiopian Renaissace Dam (GERD), gusa byarangiye binaniwe kwemeranya ku bikurikiraho nyuma y’aho bitumvikanye ku ruhare rw’impuguke zoherejwe na AU.

Minisitiri w’Ibikorwa remezo muri Sudani, Yasser Abbas, yatangaje ko batemeranyije ku ruhare impuguke zoherejwe na AU zagira mu iyubakwa ry’uru rugomero.

Sudani yasabye ko hongerwa uruhare rw’impuguke za AU muri ibi biganiro, ariko Misiri na Ethiopia zanze icyo cyifuzo.

Minisitiri w’Ububanyi n’Amahanga wa Misiri, yagize ati “Inama yarangiye ntacyo itanze, kuko Sudani yasabaga ko impuguke za AU zihabwa ububasha bwo gutanga ibisubizo by’uburyo iki kibazo cyakemuka no gutegura umushinga w’amasezerano.”

Ni mu gihe Misiri na Ethiopia byavugaga ko izo mpuguke zitari ku rwego rwo gukora izo nshingano, kuko zidafite ubunararibonye mu by’ubwubatsi no mu byo kugenzura iyubakwa ry’ingomero.

Minisitiri w’Ububanyi wa Afurika y’Epfo, Naledi Pandor, ari yo iyoboye Umuryango wa Afurika Yunze Ubumwe kuri ubu, yavuze ko bababajwe n’uko “ibiganiro byarangiye ntacyo bitanze.”

N’ubwo ibi biganiro bitagize icyo bigeraho, Ethiopia na Misiri byemeranyijwe kubikomeza ariko Sudani yo yabyigaramye, ibi byatumye iby’iki kibazo byongera gushyikirizwa Umuyobozi w’Umuryango wa Afurika Yunze Ubumwe ngo agitangeho umurongo.

Ibiganiro hagati y’ibi bihugu bimaze imyaka myinshi biba ariko nta gisubizo gihamye biratanga, hari ibyabereye i Addis Ababa, i Khartoum, i Cairo ndetse n’i Washington, ariko byose ntibiratanga igisubizo.

Umushinga wo kubaka urugomero runini ku ruzi rwa Nile, Ethiopia iri kubaka hafi y’umupaka wa Sudani, umaze kugera ku kigero cya 78%.

Ibiganiro ku iyubakwa ry'urugomero ku ruzi rwa Nile, byongeye kurangira ntacyo bigezeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .