00:00:00 IGIHE NETWORK KN KINYARWANDA EN ENGLISH FR FRANCAIS

Ibihumbi 72 bamaze guhunga intambara muri RDC, abasirikare bakatiwe urwo gupfa, n’ifungwa ry’abanyamakuru 16: Amakuru kuri Afurika

Yanditswe na IGIHE
Kuya 28 May 2022 saa 11:31
Yasuwe :

Intambara hagati y’umutwe w’inyeshyamba wa M23 n’ingabo za Repubulika Iharanira Demokarasi ya Congo mu Burasirazuba bw’iki gihugu, imaze gutuma abagera ku bihumbi 72 bava mu byabo nk’uko byatangajwe na Loni kuri uyu wa Gatanu.

Mu itangazo ryashyizwe ahagaragara n’Ishami ry’Umuryango w’Abibumbye ryita ku Mpunzi, UNHCR, ryavuze ko abantu ibihumbi 72 ari bo bavuye mu byabo mu turere twa Rutshuru na Nyiragongo kuva ku wa 19 Gicurasi 2022 nk’uko Daily Monitor yabitangaje.

Imirwano ya FARDC na M23 yatangiriye hafi y’umupaka wa Goma mu cyumweru gishize.

M23 yafashe Umujyi wa Goma mu 2012 by’igihe gito yirukanwamo mu mwaka wakurikiyeho.

Uyu mutwe w’inyeshyamba wongeye kwinjira mu ntambara uyu mwaka ushinja Guverinoma kunanirwa kubahiriza amasezerano yashyizweho umukono mu 2009 yagenaga ko ingabo za M23 zagombaga kwinjizwa mu gisirikare cy’igihugu.

Bamwe mu bavuye mu byabo babayeho ubuzima bubi mu nsengero n’amashuri muri Goma.

Abaturage ba Repubulika Iharanira Demokarasi ya Congo bamaze kuva mu byabo ari benshi

Sudani y’Epfo yanenze umwanzuro wa Loni wo kongera ikomanyirizwa mu byo kugura imbunda

Guverinoma ya Sudani y’Epfo, yagaragaje ko ibihano bishya iki gihugu cyafatiwe n’Akanama ka Loni gashinzwe umutekano birimo kutemererwa kugura imbunda nta musaruro bishobora gutanga.

Akanama ka Loni katoye umwanzuro wo kuvugurura ibi bihano mu gihe muri Sudani y’Epfo hakomeje kugaragara ibikorwa bihungabanya umutekano.

Nk’uko tubikesha The Eastafrican, Minisiteri y’Ububanyi n’Amahanga n’ubutwererane muri Sudani y’Epfo, yatangaje kuri uyu wa Gatanu ko Akanama ka Loni kari gakwiye kugendera mu murongo wa Afurika Yunze Ubumwe.

Yavuze ko imyifatire nk’iyi idafite agaciro muri iyi si yashegeshwe n’intambara harimo Umugabane wa Afurika n’u Burayi.

Guverinoma ya Sudani y’Epfo yashimye ibihugu birimo u Bushinwa, u Buhinde, u Burusiya, Gabon na Kenya ku kuba bitaratoye bishyigikiye ibihano byayo. Ibi bihugu uko ari bitanu byarifashe mu matora. Umwanzuro watowe n’aka kanama ugena ko ibihano byafatiwe Sudani y’Epfo bigomba kongererwa igihe bikageza muri Gucurasi 2023.

Ikomanyirizwa rya Sudani y’Epfo ku kugura imbunda ryatangiye mu 2018 nyuma y’amasezerano y’amahoro yashyize iherezo ku ntambara ya gisivile yamaze imyaka itanu ishyamiranyije impande zari zishyigikiye Perezida Salva Kiir na Visi Perezida Riek Machar.

Ikomanyirizwa rya Sudani y'Epfo mu byo kugura intwaro ryongerewe igihe kugera mu 2023

RDC: Abasirikare n’abasivile bakatiwe urwo gupfa bazira kugurisha intwaro

Urukiko rwa gisirikare muri Repubulika Iharanira Demokarasi ya Congo, rwakatiye urwo gupfa abantu 11 barimo abasirikare umunani n’abasivile batatu bazira kugurisha intwaro ku mutwe w’inyeshyamba ukorera ku butaka bw’iki gihugu.

Iburanisha ryabereye mu ruhame kuri uyu wa Gatanu. Perezida w’urukiko, Colonel Kelly Dianga yakatiye abasirikare umunani barimo abofisiye batatu nyuma yo guhamwa n’icyaha cyo kwifatanya n’abagizi ba nabi, ibyaha by’intambara n’ibindi.

Abasivile batatu barimo abagore babiri n’umugabo umwe na bo bakatiwe urwo gupfa bahamijwe ubufatanyacyaha muri ibyo bikorwa. Abandi basivile 10 bahanishijwe igifungo cy’imyaka 10 naho umusirikare umwe n’umusivile umwe bagirwa abere bahanagurwaho icyaha.

Nubwo RDC yakuyeho igihano cy’urupfu mu 2003, inkiko zikomeje kugitanga nk’uko Umuryango w’Abibumbye ubivuga.

Uru rubanza rwatangijwe mu kwezi gushize mu Ntara ya Ituri yayogojwe n’umutekano muke, abaregwa bashinjwa gutanga imbunda n’amasasu ku nyeshyamba za CODECO (Cooperative for the Development of the Congo) zavuzweho gukora ubwicanyi bushingiye ku moko.

Abasirikare umunani bari mu bakatiwe urwo gupfa bashinjwa kugurisha imbunda n'amasasu ku mitwe yitwaje intwaro

Ethiopie: Ifungwa ry’abanyamakuru 16 ryateje impagarara

Urwego rushinzwe iby’uburenganzira bwa muntu muri Ethiopie, rwasabye ko abanyamakuru 16 n’abandi bakozi b’ibitangazamakuru barekurwa nyuma y’aho bafunzwe mu minsi ishize mu Murwa Mukuru Adis-Ababa no mu Karere ka Amhara.

Minisitiri w’Intebe, Abey Ahmed, yashinjwe n’uru rwego ko akomeje gutera ubwoba itangazamakuru no gutoteza abatavuga rumwe n’ubutegetsi mu kugerageza guhosha ibibazo by’amakimbirane mu gihugu.

Intambara ya gisivile muri Ethiopie imaze amezi 16.

Inzego za leta zavuze ko impamvu yo gufunga abanyamakuru ishingiye ku kuba barifatanyije n’inyeshyamba.

Umuyobozi wa komisiyo y’uburenganzira bwa muntu, Daniel Bekele, yavuze ko umubare w’abamaze gufungwa ugeze kuri 16, aboneraho gusaba ko bahita barekurwa.

Umuvugizi wa Guverinoma, ntacyo yavuze ku busabe bw’iyi komisiyo.

Mu cyumweru gishize Guverinoma yari yihanangirije itangazamakuru ivuga ko itazihanganira abantu bijandika mu bikorwa binyuranyije n’amategeko bagamije guteza akaduruvayo bihishe mu mwambaro w’abanyamakuru n’ibigo by’itangazamakuru.

Amerika yafatiriye umutungo wa Yahya Jammey ugiye kugezwa mu butabera

Leta Zunze Ubumwe za Amerika zasoje igikorwa cyo guha agaciro umutungo Yahya Jammeh wahoze ari Perezida wa Gambia afite muri iki gihugu ndetse yemeza ko ugomba gufatirwa ukazasubizwa mu gihugu cye.

Iyi mitungo ifite agaciro ka miliyoni 3,5 z’amadolari urimo inzu iherereye muri Washington DC.

Urubanza rwa nyuma rwarangiye mu cyumweru gishize.

Amerika ivuga ko ikeka ko iyi mitungo yaguzwe mu mafaranga ya ruswa n’ayibwe mu mutungo wa leta bihanwa n’amategeko arwanya ruswa muri iki gihugu.

Imitungo ya Yahya Jammeh muri Amerika yafatiriwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .