00:00:00 IGIHE NETWORK KN KINYARWANDA EN ENGLISH FR FRANCAIS

Ibidasanzwe kuri Lt Col Sandaogo Damiba wahiritse ubutegetsi muri Burkina Faso

Yanditswe na Umwali Zhuri
Kuya 25 January 2022 saa 08:53
Yasuwe :

Paul-Henri Sandaogo Damiba ubu niwe ufashe inkoni y’ubutegetsi muri Burkina Faso nyuma yo guhirika Christian Kaboré wari Perezida w’icyo gihugu.

Damiba ni umusirikare ufite ipeti rya lieutenant-colonel mu ngabo zirwanira ku butaka muri Burkina Faso.

Ku wa 3 Ukuboza umwaka ushize ni bwo yagizwe umuyobozi w’akarere ka gatatu ka gisirikare mu gihugu, uru rwego ni rwo rwari rufite inshingano zo kurwanya iterabwoba mu Karere k’u Burasirazuba bw’igihugu ndetse n’umutekano mu Murwa Mukuru Ouagadougou.

Yashyizwe kuri uwo mwanya n’iteka ryashyizweho umukono n’uwo yahiritse Roch Marc Christian Kaboré, mu mpinduka zakozwe mu nzego za gisirikare nyuma y’igitero cyabereye ahitwa Inata cyahitanye abantu 57 barimo abajandarume 53 mu mezi atatu ashize cyateje impagarara mu gihugu.

Abaturage bateguye ndetse bahurira mu myigaragambyo yasabaga ko igisirikare gifashwa byisumbuye aho Perezida Kaboré yanenzwe uko yabyitwayemo.

Lieutenant-colonel Paul-Henri Sandaogo Damiba, kimwe n’abandi benshi bahawe inshingano mu ntangiriro z’ukwezi gushize, ni bamwe mu barwanye ku butegetsi bwa Michel Kafando mu 2015 ubwo yari ayoboye inzibacyuho, agashaka guhirikwa na Général Gilbert Diendéré

Damiba wari uyoboye itsinda ry’abasirikare bashinzwe kurwanya iterabwoba, ngo yahamagawe na bamwe mu bashakaga guhirika ubutegetsi bamubaza niba ari kumwe nabo, arabahakanira.

Lieutenant-colonel Damiba ni umusirikare w’umwuga, wanditse igitabo kigaruka ku iterabwoba mu gace ka Sahel yise “Armées ouest-africaines et terrorisme : Réponses incertaines ?.

Uyu mugabo yize muri Ecole militaire de Paris aho yarangije mu 2017, akaba afite impamyabumenyi y’icyiciro cya gatatu cya Kaminuza (Masters) mu bijyanye n’ubumenyi ku byaha, n’indi mu bijyanye n’ubuyobozi mu bya gisirikare.

Guhera mu 2015 kugeza mu 2019, Damiba yagize uruhare mu bikorwa bitandukanye byo guhashya imitwe y’iterabwoba muri Sahel.

Damiba na bagenzi be batangaje ko bahiritse Perezida Kabore kuko yananiwe guhashya iterabwoba mu gihugu ndetse hakaba hari hashize iminsi hari imyigaragambyo y’abaturage bagaragaza ko ubutegetsi bwe butabitayeho.

Abasirikare bahiritse ubutegetsi bahise basesa Guverinoma n’Inteko Ishinga Amategeko, Itegeko Nshinga rirahagarikwa ndetse imipaka ihuza Burkina Faso n’ibindi bihugu irafungwa.

Paul-Henri Sandaogo Damiba asanzwe ari umusirikare mu ngabo za Burkina Faso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .