Haratutumba umwuka wo gutandukana hagati y’ihuriro rya Kabila n’irya Tshisekedi

Yanditswe na Ishimwe Israel
Kuya 18 Ugushyingo 2020 saa 07:58
Yasuwe :
0 0

Umwuka si mwiza hagati y’Impuzamashyaka ya Joseph Kabila wahoze ari Perezida wa Repubulika Iharanira Demokarasi ya Congo na Perezida Félix Tshisekedi wamusimbuye ndetse hari ibimenyetso ko ihuriro bashyizeho rishobora gucikamo ibice.

Uwo mwuka mubi ushingiye ku masezerano atubahirizwa bivugwa ko Kabila yagiranye na Tshisekedi mbere yo kumuha ubutegetsi mu 2019.

Mu Ukwakira 2020, Perezida Tshisekedi yatangiye ibiganiro n’abanyapolitiki batavuga rumwe na Leta barimo Jean Pierre Bemba, Moïse Katumbi n’abandi, bigamije kubiyegereza mu gihe amatora yo mu 2023 yegereje kandi umwuka hagati y’impuzamashyake ye CASH n’iya Kabila FCC utameze neza.

Mu ntangiriro z’Ugushyingo, Kabila yoherereje abahagarariye ibihugu byabo muri RDC ibaruwa isobanura ibibazo bya politiki biri mu gihugu n’uburyo Tshisekedi ari kurenga ku masezerano bagiranye afata ubutegetsi, avuga ko kuba atubaha amategeko agamije kwikubira.

Nyuma yo gutsindwa kw’ishyaka rye mu matora yo mu nteko, mu 2019 Tshisekedi yemeye gusangira ubutegetsi na Kabila binyuze mu mashyaka yabo, Cap pour le Changement (CACH) rya Félix Tshisekedi na Vital Kamerhe na FCC (Le Front Commun pour le Congo) rya Joseph Kabila.

Kuva icyo gihe, iri huriro ryatangiye guhanganira imyanya irimo iy’abaminisitiri ndetse n’ibigo bya leta mu butabera na Komisiyo y’Igihugu y’Amatora.

Ikibazo cyakajije umurego mu mezi atandatu ashize ubwo Jean-Marc Kabund a Kabund wari Perezida w’Inzibacyuho w’Ishyaka rya Tshisekedi, UPDS yirukanwaga ku mwanya we wa Visi Perezida w’Inteko Ishinga Amategeko.

Ni icyemezo cyafashwe bigizwemo uruhare n’uruhande rwa Kabila. Ibi byiyongeraho ko hari bamwe mu bagize Guverinoma bangaga gushyira mu bikorwa amabwiriza yatanzwe na Tshisekedi.

The Conversation yanditse ko inteko yiganjemo abo ku ruhande rwa Kbaila yashinje Tshisekedi kunyuranya n’Itegeko Nshinga no gukoresha urwego rw’ubutabera.

Mu byo uyu Mukuru w’Igihugu ashinjwa harimo gushyiraho abacamanza batatu mu Rukiko rushinzwe kurengera Itegeko Nshinga binyuranye n’itegeko.

Abagize Inteko banywanye na Kabila bakunze kutitabira gahunda za Tshisekedi zo muri Guverinoma no mu Nteko ndetse abashyigikiye Kabila ntibitabiriye irahira ryabo.

Tshisekedi wabaye Perezida mu mezi 20 ashize, mbere yaho Ishyaka rye rya UPDS ryari rimaze imyaka 35 ritavuga rumwe n’ubutegetsi kuva kuri Mobutu Sese Seko, Laurent Désiré Kabila n’umuhungu we Joseph Kabila.

Bitewe no kuba UPDS itarashoboye kubona umubare w’abadepite bayemerera gushyiraho guverinoma, byabaye ngombwa ko yinjira mu bufatanye na FCC ya Kabila yari ifite umubare w’abadepite bakenewe.

Kuva Tshisekedi agiye ku butegetsi, ubuyobozi bw’igihugu bwabaye nk’imodoka itwawe n’abashoferi babiri ariko icyerekezo cy’ubukungu cyo cyakomeje kuba inzozi.

-  Urunturuntu mu ihuriro rya Kabila na Tshisekedi rwagaragaye rugikubita…

Ukutumvikana hagati y’abagize ihuriro rya Kabila na Tshisekedi kwatangiranye n’uburyo bwo gusaranganya intebe z’abaminisitiri, kuyobora ibigo bya Leta, dipolomasi, uko amatora akorwa, ishyirwaho ry’umuyobozi wa Komisiyo y’Igihugu y’Amatora ndetse n’abacamanza b’Urukiko rushinzwe Itegeko Nshinga.

Mu busesenguzi bw’inzobere zigaragaza ko iri huriro nta musaruro ryari kwitegwaho kuko ridakorera inyungu z’Abanye-Congo.

Kuri Kabila, yashakaga kugumana ubutegetsi mu bundi buryo kuko ishyaka rye ryakoresheje ubwinshi bwaryo mu Nteko ribona imyanya muri Guverinoma no mu bigo bya Leta birimo Ikigo gishinzwe ibijyanye na Gari ya Moshi n’icy’Ubucukuzi n’Ubucuruzi bw’amabuye y’agaciro (Gécamines).

Ku rundi ruhande, Perezida Tshisekedi, intego ye kwari ukwifashisha iryo huriro mu gushwanyaguza imiyoborere ishingiye ku bucuti n’icyenewabo ndetse na ruswa byari byarimakajwe ku butegetsi bwa Kabila.

-  Urugendo ruganisha ku gutandukana ruri bugufi…

Nyuma y’ibiganiro bitatanze umusaruro yagiranye n’uruhande rwa Kabila, bisa n’aho Tshisekedi yarambiwe imikorere yo muri guverinoma ihuriweho.

Mu ijambo yagejeje ku benegihugu ku wa 23 Ukwakira ariko yanenze ibikorwa bidakwiye bitizwa umurindi n’uruhande rwa Kabila.

Yagize ati “Uku kutumvikana hagati y’amashyaka arebwa n’aya masezerano biri kudindiza ubukungu bw’igihugu.’’

Yatangaje ko yatangiye kugisha inama ku bayobozi batandukanye, abanyamadini n’abanyepolitiki ku buryo bwo gukora amavugurura. Ni intambwe igezweho yafasha Tshisekedi kugira abadepite benshi mu Nteko, akanashyiraho Guverinoma yiyumvamo.

Perezida Tshisekedi yavuze ko nta kintu na kimwe gikwiye kubangamira inyungu rusange z’abaturage ndetse n’igihugu cye. Amagambo ye yatumye benshi bahita babona ko imikoranire ihuriweho, y’ishyaka rye n’irya Kabila iri mu marembera.

Abo ku ruhande rwa Kabila babaye nk’abatungurwa mu gihe baheruka kunanirwa kwemeza umugambi wo kweguza Perezida Tshisekedi ndetse kuri ubu usa n’ugoye kuko yashyizeho abacamanza bashya mu Rukiko rushinzwe Itegeko Nshinga.

Urukiko rushinzwe Itegeko Nshinga nirwo rwemeza ibyavuye mu matora ya Perezida n’ay’abagize Inteko, ndetse umwanzuro warwo uba ari ntakuka.

Abo ku ruhande rwa Kabila bafite ubwoba ko impinduka zakozwe zishobora kuba ziri mu mugambi wa Perezida Tshisekedi wo kwigarurira ubwiganze mu Nteko.

Mu gihe ubusabe bwa Perezida Tshisekedi bwakubahirizwa bizamuha ububasha bwo kwigobotora ijisho rya Kabila kuri Guverinoma ye.

Icyo gihe, Perezida Tshisekedi azashobora gushyiraho Guverinoma ye binyuze mu bwiganze mu Nteko n’umurongo we wa Politiki yemera kandi agenderaho.

Abasesenguzi bagaragaza ko ibi Tshisekedi azabigeraho binyuze mu nzira ebyiri arizo gusesa inteko no guhita akoresha amatora y’inteko cyangwa gukora ihuriro rishya ririmo abandi bashya mu bagize Inteko.

Gukoresha amatora bisa n’ibigoye kubera igihe n’inkunga zo kuyategura mu gihe icyemezo cyo kwiyegereza abantu bashya cyashoboka cyane ko afitanye umubano n’abataravugaga rumwe na Kabila nka Bahati Lukwebo, Moïse Katumbi na Jean-Pierre Bemba.

Joseph Kabila (ibumoso) ashimira Félix Tshisekedi wamusimbuye kuyobora RDC muri Mutarama 2019. Aba bombi kuri ubu ntibameranye neza kubera bimwe mu byemezo bifatwa ntibihurizweho/Ifoto: EFE

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .