Guverinoma ya Tanzania yokejwe igitutu ngo yemere ko hari COVID-19

Yanditswe na Dufitumukiza Salathiel
Kuya 21 Gashyantare 2021 saa 11:56
Yasuwe :
0 0

Urugaga rw’Abanyamategeko ba Tanganyika (TLS) rwasabye Guverinoma ya Tanzania kwemera ko muri icyo gihugu hari icyorezo cya Coronavirus no gufata ingamba zihamye zo guhangana nacyo.

Mu itangazo ryashyizweho umukono na Perezida wa TLS, Dr Rugemeleza Nshala, yibukije ko uru rugaga rufite inshingano zo kugira inama Ubutegetsi, Inteko Ishinga Amategeko, Ubutabera ndetse na rubanda, aboneraho kuvuga ko kutagaragaza ko icyorezo kiri mu gihugu binyuranyije n’amategeko.

TLS yasabye Perezida Magufuli na Guverinoma ye kwemeza byeruye ko icyorezo gihari kandi cyugarije abenegihugu kugira ngo hashyirwaho ingamba ziboneye zo kucyirinda ndetse.

Yanasabye Guverinoma ya Tanzania gutanga amakuru yizewe ku bwandu, abakize n’impfu za COVID-19. TLS yatangaje ko hari abantu benshi bibasiwe n’icyorezo abandi kikabahitana ariko bikagirwa ibanga.

TLS kandi yasabye urwego rw’ubutabera kwihutisha imanza hitabazwa ikoranabuhanga, abakekwa bagatanga ingwate ntibafugwe, ibihano bimwe bigasubikwa hagakoreshwa guca amande no gutanga imirimo nsimburagifungo hagamijwe kugabanya ubucucike mu magereza hirindwa kwanduzanya.

Dr Nshala yagize ati “Kumva ubujurire bikwiye kwihutishwa kandi abatarahamywa ibyaha bakaba barekuwe by’agateganyo igihe bamara muri gereza kikagabanuka.”

“Guverinoma ikwiye kugenzura ko nta bucucike buri mu modoka n’ahakorerwa imyidagaduro n’ibindi bikorwa by’umuco. Abakora mu rwego rw’ubuzima na bo bakwiye guhabwa ibikoresho by’ubwirinzi.”

Guverinoma ya Tanzania yahakanye kenshi ko nta Coronavirus iharangwa, ndetse ntiheruka gutangaza imibare y’ubwandu, impfu n’abakize icyorezo. Imibare iheruka gushyirwa ahagaragara ni iyo muri Gicurasi 2020, ubwo abari bamaze kwandura bari 509 n’abapfuye 21.

Iki gihugu cyanenzwe n’imiryango itandukanye ndetse ibihugu bimwe binafata umwanzuro wo gukumira ingendo ziva cyangwa izerekezayo.

OMS yayisabye kwisubiraho

Ishami ry’Umuryango w’Abibumbye ryita ku Buzima ryasabye Tanzania kwisubiraho ikagaragaza uko icyorezo gihagaze nk’uko ibindi bihugu bibigenza.

Mu butumwa Umuyobozi wa OMS, Dr Tedros Adhanom Ghebreyesus, yashyize ku rubuga rw’iryo shami kuri iki Cyumweru, yatangaje ko kugeza ubu nta makuru ajyanye n’ishusho ya COVID-19 muri icyo gihugu.

Yagize ati “Uko ibintu bimeze haracyari impungenge. Nongeye guhamagarira Tanzania kumenyekanisha ubwandu bwa COVID-19 no kudusangiza amakuru ajyanye nayo.”

Perezida w’icyo gihugu, John Pombe Magufuli, we yumvikanye kenshi avuga ko Imana ari yo izarwanira urugamba Abanya-Tanzania, abasaha gufata iminsi yo gusenga. Yavuze ko kandi atazigera ashyiraho Guma mu rugo.

Ishami ry'Umuryango w'Abibumbye rishinzwe kwita ku buzima rishinja Tanzania kuba idatangaza amakuru nyayo kuri COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .