00:00:00 IGIHE NETWORK KN KINYARWANDA EN ENGLISH FR FRANCAIS

Guterres yahamagariye abasirikare muri Burkina Faso, Guinea na Mali gusubiza ubutegetsi abasivile

Yanditswe na Léana Bisa
Kuya 2 May 2022 saa 01:52
Yasuwe :

Kuri iki cyumweru tariki, Umunyamabanga Mukuru w’Umuryango w’Abibumbye, Antonio Guterres, yahamagariye inama za gisirikare zafashe ubutegetsi mu buryo butubahirije amategeko muri Burkina Faso, Guinea na Mali gusubiza ubutegetsi mu maboko y’abasivile.

Nyuma yo kubonana na Perezida wa Senegal, Macky Sall i Dakar, Guterres yavuze ko bumvikanye ko ari ngombwa gukomeza kuganira n’abayobozi b’ibi bihugu uko ari bitatu kugira ngo bongere kubahiriza icyo itegeko nshinga rigena nk’uko tubikesha France24.

Ibihugu uko ari bitatu bihanganye n’agatsiko k’abiyitirira ko barwanirira idini ya Islam mu karere ka Sahel, ubutegetsi bwabyo buherutse guhirikwa n’abasirikare. Muri Mali byabaye muri Kanama 2020 na Gicurasi 2021 muri Guinea biba muri Nzeri 2021 naho muri Burkina Faso biba muri Mutarama 2022.

Macky Sall ni umuyobozi w’umuryango uhuza ibihugu byo mu burengerazuba bwa Afurika (ECOWAS), wahagaritse ibi bihugu bitatu nk’abanyamuryango bawo.

Muri Mutarama ECOWAS yafatiye ibihano bikomeye Mali nyuma y’uko abafashe ubutegetsi ku ngufu banze kubusubiza abasivile.

ECOWAS ikomeje gushyira igitutu kuri Guinea na Burkina Faso ivuga ko izayifatira ibihano nk’ibyafatiwe Mali niramuka idashoboye gushyiraho ubutegetsi bugasubizwa abaturage mu gihe gito gishoboka.

Icyakora, ubutegetsi bwa gisirikare muri ibi bihugu byose nta gahunda yo kubahiriza ingengabihe yo gutanga ubutegetsi yashyizweho na ECOWAS.

Ku wa mbere ushize, Burkina Faso yavuze ko nta gahunda ifite yo kugabanya igihe cy’imyaka itatu yatanze mbere.

Ku mugoroba wo ku wa Gatandatu, Umuyobozi w’abasirikare bafashe ubutegetsi ku ngufu muri Guinea, Colonel Mamady Doumbouya, yatangaje ko bakeneye igihe cy’amezi 39 kugira ngo babone gusubiza ubutegetse abaturage.

Ibi byamaganwe ku Cyumweru n’abayobozi batavuga rumwe n’ubutegetsi harimo n’ishyaka rya perezida wavanywe ku butegetsi Alpha Condé.

Ubutegetsi muri Mali na bwo bukomeje kurwanya igitutu cya ECOWAS kuko ku ya 21 Mata bwatangaje ko hatangijwe inzira yo gusubiza ubutegetsi abaturage izafata imyaka ibiri hakabona gukorwa amatora. ECOWAS yari yifuje ko amatora yakorwa mu mezi 16.

Antonio Guterres yahamagariye abasirikare muri Burkina Faso, Guinea na Mali gusubiza ubutegetsi mu maboko y’abasivile

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .