00:00:00 IGIHE NETWORK KN KINYARWANDA EN ENGLISH FR FRANCAIS

Gusabiriza byagizwe ikizira mu Burundi, umusenateri yafashwe agiye gucuruza umwana: Avugwa muri Afurika

Yanditswe na IGIHE
Kuya 24 June 2022 saa 11:16
Yasuwe :

Minisiteri ishinzwe imibereho myiza y’abaturage mu Burundi, yashyize hanze itangazo risaba abantu bari batunzwe no gusabiriza kubihagarika ndetse n’ababafashaga bakabireka kuko uzafatwa abikora azahanwa n’amategeko.

Abari batunzwe no gusabiriza mu muhanda, bahawe icyumweru kimwe cyo kuba babihagaritse uhereye tariki 21 Kamena 2022.

Iyo Minisiteri yatangaje ko umuntu wese ufite ikibazo gituma ajya gusabiriza, akwiriye kukimenyesha inzego zibishinzwe zikamufasha aho kujya mu muhanda.

Ku bantu bafite umutima utabara bajyaga bafasha abasabiriza, Leta ivuga ko hari inzego nyinshi zashyizweho zishobora kunyuzwamo iyo nkunga ikagera ku bo yagenewe. Bitabaye ibyo, uzafatwa afasha abasabiriza na we azahanwa n’amategeko.

Malawi: Uwahoze ari umuyobozi Mukuru wa Polisi yatawe muri yombi

Urwego rushinzwe kurwanya ruswa muri Malawi rwataye muri yombi Dr George Kainja wahoze ari Umuyobozi Mukuru wa Polisi, nyuma y’umunsi umwe yirukanywe mu mirimo na Perezida Lazarus Chakwera ashinjwa ruswa.

Kaija ashinjwa kugira uruhare mu kurya ruswa y’asaga ibihumbi 800 by’amadolari, muri dosiye y’amasoko ya Leta mu gisirikare no muri Polisi yahawe ibigo by’umuherwe Zuneth Sattar uba mu Bwongereza.

Ikinyamakuru Nyasa Times cyatangaje ko Kaija ashinjwa kwakira ruswa y’ibihumbi umunani by’amadolari ndetse n’imodoka kugira ngo atange isoko kuri sosiyete za Sattar.

Hari kandi abandi bayobozi bakuru muri Polisi batawe muri yombi barimo n’uwari wungirije Kaija.

Mu ntangiriro z’iki cyumweru nibwo Perezida Chakwera yambuye ububasha Visi Perezida we, Saulos Klaus Chilima nyuma yo kuvugwa muri iyo dosiye ya ruswa.

Ethiopia: Leta yateye utwatsi iby’ibura ry’ibikomoka kuri peteroli muri Tigray

Leta ya Ethiopia kuri uyu wa Kane yateye utwatsi inkuru z’uko mu ntara ya Tigray imaze igihe mu ntambara, haba hari ibura ry’ibikomoka kuri peteroli, ahubwo ishinja inyeshyamba zo muri ako gace gutegura ibitero bishya.

Imiryango nterankunga imaze iminsi ivuga ko ubuke bw’ibikomoka kuri peteroli mu Murwa Mukuru Addis Ababa, biri kubagiraho ingaruka zo kutabasha kugeza ibyangombwa nkenerwa mu Ntara ya Tigray iri mu Majyaruguru.

Iyo ntara irimo ibihumbi by’impunzi zahunze intambara hagati y’ingabo za Leta n’inyeshyamba za TPLF zigumuye kuri Leta.

Ku wa Kabiri w’iki Cyumweru, intumwa z’Umuryango w’Ubumwe bw’u Burayi zasabye Leta gukuraho amabwiriza yo kutageza ibicuruzwa muri Tigray by’umwihariko ibijyanye n’ibikomoka kuri peteroli.

Leta yabinyomoje kuri uyu wa Kane ivuga ko kuwa Kane ushize imodoka zitwaye litiro zisaga ibihumbi 130 bya lisansi zageze mu Murwa Mukuru wa Tigray, Mekele mu cyumweru gishize.

Leta kandi yavuze ko guhera muri Mata uyu mwaka, litiro za lisansi zisaga ibihumbi 900 zimaze koherezwa muri Tigray, bityo ko ibivugwa atari byo.

Mu itangazo bagize bati “Ikinyoma cy’uko ibikomoka kuri peteroli ari bike, ni umugambi uhishe wa TPLF kugira ngo yigwizeho ubushobozi bwo kwitegura kugaba ibindi bitero.”

Loni ivuga ko intambara ya Leta na TPLF yatangiye mu 2020, yatumye abasaga miliyoni icyenda muri Tigray bajya mu kaga ko kubura ibiribwa, ikavana ibihumbi n’ibihumbi mu byabo.

Kenya: Abakozi bashinzwe imisoro bagiye kujya bambara imyenda iriho camera

Mu rwego rwo guhangana n’inyerezwa ry’imisoro, Ikigo gishinzwe Imisoro n’Amahoro muri Kenya, Kenya Revenue Authority (KRA), cyatangaje ko abakozi bacyo bagiye kujya bambara imyenda iriho camera.

Ikinyamakuru Business Daily cyatangaje ko camera zizajya zambarwa n’abakora mu bijyanye n’imisoro imbere mu gihugu no ku mipaka.

Bamwe mu bakozi b’icyo kigo bakunze gushinjwa kugira uruhare mu kunyereza imisoro, bagahabwa ruswa kugira ngo abayibahaye badasoreshwa.

Byatumye bamwe mu bakorera icyo kigo baba abaherwa nyamara ugasanga ibyo batunze n’imishahara bahembwa ntibihuye.

Komiseri Mukuru wa KRA, Githii Mburu yagize ati “Vuba aha abakozi bacu bazajya bambara camera nkuko bimeze muri Amerika kugira ngo buri gikorwa bakoze tube tukireba. Mu gihe camera yazimijwe, tugomba kumenya impamvu yazimye.”

Kwambara camera ku bakozi ba KRA bizahera ku duce tunyuraho urujya n’uruza rwinshi nko ku mipaka, ku byambu no ku bibuga by’indege.

Kwambara camera ku bakozi ba KRA ngo bizafasha kuganaya ruswa

Nigeria: Umusenateri arashinjwa gushaka gucuruza ibice by’umubiri w’umwana

Senateri Ike Ekweremadu w’imyaka 60 muri Nigeria, yatangiye gukurikiranwa n’inkiko ashinjwa umugambi wo kujyana umwana w’umuhungu mu Bwongereza, ashaka gucuruza zimwe mu ngingo z’umubiri we.

Kuri uyu wa Kane Ike n’umugore we Beatrice Nwanneka Ekweremadu bagejejwe imbere y’urukiko rwa Uxbridge mu Burengerazuba bw’Umujyi wa Londres.

Umwana wari ugiye gucuruzwa ibice by’umubiri yatabawe bitaraba nk’uko Polisi y’u Bwongereza yabitangaje, ubu ari kwitabwaho.

Abakekwaho icyaha batawe muri yombi mu minsi ibiri ishize, bakaba bazongera kugaruka mu rukiko ku wa 7 Nyakanga uyu mwaka.

Ekweremadu usanzwe ari umwarimu muri Kaminuza ya Lincoln, mu bihe bitandukanye yabaye Visi Perezida w’Inteko Ishinga Amategeko ya Nigeria guhera mu 2007 kugeza mu 2019.

Ni umwe mu barwanashya b’ishyaka People’s Democratic Party (PDP). Yabaye umusenateri guhera mu 2003.

Ekweremadu n'umugore we bafatiwe mu Bwongereza bagiye gucuruza ingingo z'umwana w'umuhungu

Sudani y’Epfo: Hatangiye kubakwa ingoro nshya ya Perezida

Muri Sudani y’Epfo hatangiye umushinga wo kubaka ingoro nshya ya Perezida witabiriwe na Perezida uriho Salva Kiir.

Ni umushinga BBC ivuga ko uzamara imyaka ibiri, amafaranga yose azakoreshwaho akaba ari aya Leta.

Ntabwo hatangajwe umubare nyawo w’amafaranga iyo ngoro izatwara, icyakora ni umushinga utangiye mu gihe igihugu cyugarijwe n’ibura ry’ibiribwa aho Loni ivuga ko hafi kimwe cya kabiri cy’abaturage bafite ikibazo cyo kubona ibibatunga.

Biteganyijwe ko iyi nyubako izaba ari ibiro bya Perezida n’izindi nzego za Leta.

Leta ivuga ko benshi mu bazakoreshwa hubakwa iyo ngoro ari abenegihugu kandi ko niyuzura izaba ihiga izindi ziri muri Afurika y’Iburasirazuba.

Ingoro ya Perezida wa Sudani y'Epfo izuzura mu gihe cy'imyaka ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .