00:00:00 IGIHE NETWORK KN KINYARWANDA EN ENGLISH FR FRANCAIS

Ghana: Abantu benshi baguye mu iturika ry’intambi zikoreshwa mu bucukuzi bw’amabuye y’agaciro

Yanditswe na Rosine Ingabire
Kuya 21 January 2022 saa 08:43
Yasuwe :

Abantu 17 ni bo bimaze kumenyekana ko baguye mu iturika ry’intambi zifashishwa mu bucukuzi bw’amabuye y’agaciro muri Ghana, mu gace kazwi nka Bogoso gaherereye mu Burengerazuba bw’icyo gihugu.

Polisi yatangaje ko imodoka yari itwaye izo ntambi izijyanye mu birombe yagonganye na moto mu Mujyi wa Bogoso, hakaba impanuka ari nayo yatumye izo ntambi ziturika.

Amashusho yakwirakwijwe ku mbuga nkoranyambaga yagaragaje umwotsi mwinshi uzamuka hejuru y’inyubako zasenyutse, ari nako amajwi y’abaturage yumvikanaga basaba ubufasha.

Muri ayo mashusho kandi hagaragaramo imirambo myinshi y’abantu baryamye hasi bacitse bimwe mu bice by’umubiri.

Minisitiri w’Itumanaho muri icyo gihugu, Kojo Oppong Nkrumah, yatangaje ko nibura abantu 59 aribo bimaze kumenyekana ko bakomeretse.

Perezida Nana Akufo-Addo yatangaje ko igisirikare cyahise gitabara na Guverinoma ikaba iri gutanga ubufasha ku bagizweho ingaruka n’iyo mpanuka.

Mu gihe inzego z’umutekano zatangiye gushakisha abahitanywe n’abakomerekeye muri iyo mpanuka, abatuye agace byabereyemo basabwe kuhava.

Polisi yasabye abafite amashuri n’insengero mu duce twegereye aho byabereye kubifungura kugira ngo abasigaye iheruheru babone aho barambika umusaya.

Inzu zisaga 500 zasenyutse mu gihe abantu 17 aribo bamaze kumenyekana ko baguye muri iyo mpanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .