00:00:00 IGIHE NETWORK KN KINYARWANDA EN ENGLISH FR FRANCAIS

Gambie: Adama Barrow yatsinze amatora ya Perezida

Yanditswe na IGIHE
Kuya 6 Ukuboza 2021 saa 07:07
Yasuwe :

Komisiyo y’Amatora muri Gambie yatangaje ko Adama Barrow ari we wegukanye intsinzi ku mwanya w’Umukuru w’Igihugu mu matora yabaye ku wa Gatandatu tariki ya 4 Ukuboza 2021.

Perezida wa Komisiyo, Alieu Momarr Njai, yatangaje ibyavuye mu matora kuri iki Cyumweru, amasaha make nyuma y’aho abatavuga rumwe n’ubutegetsi bari bamaganye amajwi y’agateganyo yahaga amahirwe Adama.

Aya matora ni yo ya mbere abaye kuva Yahya Jammeh ufatwa nk’umunyagitugu avuye ku butegetsi ndetse agahunga mu 2017.

Mu gitondo cyo ku Cyumweru, Umuyobozi w’indorerezi zo mu muryango w’ubukungu uhuje ibihugu byo mu Burengerazuba bwa Afurika (ECOWAS), yari yahamagariye abakandida bose kwemera ibiva mu matora nta ngingimira.

Mu gihe abakandida batatu mu batavuga rumwe na Barrow bari bamaganye amajwi y’agateganyo, abamushyigikiye bo bari batangiye kubyina intsinzi mu mihanda y’Umurwa Mukuru, Banjul.

Barrow yasimbuye ku butegetsi Yahya Jammeh wayoboye Gambie imyaka 22 nyuma yo guhirika ubutegetsi mu 1994. Jammeh yahungiye muri Guinée Equatoriale muri Mutarama 2017.

Barrow w’imyaka 56 y’amavuko ayoboye igihugu gifite abantu benshi batazi gusoma no kwandika ndetse kiri mu bya mbere bikennye cyane ku Isi.

Abagera kuri kimwe cya kabiri batunzwe n’amafaranga ari munsi y’idolari 1,90 ku munsi nk’uko Banki y’Isi ibitangaza.

Abashyigikiye Adama Barrow bishimira intsinzi mu mihanda yo mu Mujyi wa Banjul

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .