00:00:00 IGIHE NETWORK KN KINYARWANDA EN ENGLISH FR FRANCAIS

FARDC yise uburyarya icyemezo cya M23 cyo kuva Kibumba

Yanditswe na IGIHE
Kuya 25 Ukuboza 2022 saa 05:40
Yasuwe :

Igisirikare cya Repubulika Iharanira Demokarasi ya Congo, FARDC, cyatangaje ko icyemezo cy’umutwe wa M23 cyo kuva mu gace ka Kibumba wari warigaruriye ari ukwiyamamaza kugamije kurangaza abanye-Congo n’umuryango mpuzamahanga.

Umutwe wa M23 kuwa Gatanu tariki 23 Ukuboza 2022, wavuye mu gace ka Kibumba wari warigaruriye ugahereza Ingabo za Afurika y’Uburasirazuba nk’uko byari byemejwe mu masezerano aherutse guhuza Abakuru b’ibihugu bya Afurika y’Uburasirazuba, i Luanda.

Itangazo ryasohowe n’igisirikare cya FARDC kuri uyu wa Gatandatu, cyavuze ko ‘abarwanyi ba M23 bavuye Kibumba aho kujya mu birindiro byayo muri Sabyinyo nk’uko byemejwe n’inama ya Luanda, bafashe ikindi cyerekezo bakajya kongerera imbaraga ibirindiro bya Tongo, Kishishe na Bambu, bagamije kwigarurira agace ka Masisi’.

FARDC yakomeje ivuga ko imirwano yo kuwa 23 Ukuboza 2022, yahuye igisirikare cya leta n’abarwanyi ba M23 muri pariki ya Virunga hagati ya Tongo na Sake inyuma y’ikirunga cya Nyamuragira, yagaragaje ko M23 ishaka gufata Sake mu bilometero 30 bya Goma. M23 kandi ngo irashaka kwigarurira Nyanzale, Kibirizi na Kitchanga.

Muri iri tangazo FARDC yavuze ko ‘yamagana imyitwarire y’uburyarya ya M23 kandi irajwe ishinga no kurinda ubusugire bw’igihugu’.

Itangazo ryashyizweho umukono n’Umuvugizi wa Politiki wa M23, Lawrence Kanyuka ubwo yarekuraga Kibumba rivuga ko uyu mutwe wakoze ibi, mu rwego rwo kugarura amahoro.

Riti “Ibi bikozwe mu izina ryo kugarura amahoro ndetse biri mu mujyo w’imyanzuro y’inama yabaye tariki ya 23 Ugushyingo 2022 yahuje Abakuru b’Ibihugu bya Afurika y’Uburasirazuba yigaga ku bibazo by’umutekano muke mu Burasirazuba bwa RDC i Luanda. Twizeye ko Leta ya Congo irafata aya mahirwe nka bumwe mu buryo bwo kugarura amahoro mu gihugu.”

Ingabo za Afurika y’Uburasirazuba zahawe ibi bice bya Kibumba na M23, zituruka mu bihugu bitandukanye aho Kenya yonyine yohereje abasirikare 900 mu Mujyi wa Goma ndetse ibihugu nka Sudani y’Epfo, Uganda n’u Burundi na byo ziteganya kuzohereza.

M23 yatanze Kibumba yari yarayifashe mu Ugushyingo uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .