00:00:00 IGIHE NETWORK KN KINYARWANDA EN ENGLISH FR FRANCAIS

EU yanenze Uganda kubera uburyo abatavuga rumwe na Leta bari kwibasirwa

Yanditswe na Tuyishimire Raymond
Kuya 29 Ugushyingo 2020 saa 08:27
Yasuwe :
0 0

Umuryango w’ubumwe bw’u Burayi (EU) wanenze inzego z’umutekano za Uganda ko mu cyumweru gishize zakoresheje imbaraga z’umurengera mu guhagarika abigaragambya, ubwo Polisi yataga muri yombi Robert Kyagulanyi uzwi nka Bobi Wine, uri gushaka kwiyamamariza umwanya w’umukuru w’Igihugu.

Abahagaririye umuryango w’ubumwe bw ’ u Burayi muri Uganda, basabye ko hakorwa ipereza risesuye kandi ryigenga ku bikorwa byakozwe ku matariki ya 18 na 19 ,hagamijwe guha ubutabera abakorewe ihohoterwa kandi no guca umuco wo kudahana ngo ababigizemo uruhare babiryozwe .

Bagize bati “Mu cyumweru gishize hari ababonye imvururu z’abigaragambya aho inzego z’umutekano zarakoresheje imbaraga z’umurengera. Leta ya Uganda ndetse n’inzego zabo bafite inshingano zo kurinda no guha umutekano abaturage barimo n’abayimamariza umukuru w’igihugu ndetse n’ababashyigikiye. Byose bigakorwa hubahirijwe amategeko ndetse n’uburenganzira bwa muntu”.

EU itangaje ibi nyuma ya Leta zunze ubumwe za Amerika ndetse n’Umuryango wunze ubumwe, bagize icyo batangaza ku bikorwa by’ihohoterwa bibera Uganda mbere y’uko amatora y’umukuru w’igihugu aba.

Polisi yemeje ko imibare y’abamaze kugwa mu guhangana hagati y’abashyigikiye Kyagulanyi ndetse n’abashinzwe umutekano babarirwa kuri 50.

Hashize iminsi Bobi Wine abuzwa kugera aho yabaga yateguye kwiyamamariza, cyangwa agatinzwa mu nzira kugira ngo aze gukererwa.

Aherutse kubuzwa kurara muri hotel mu gace ka Hoima yari yagiye kwiyamamarizamo, arara hanze mu modoka we n’abarwanashyaka be.

Leta ya Uganda imushinja kurenga ku mabwiriza yo kwirinda Coronavirus mu bikorwa bye byo kwiyamamaza. EU yasabye imitwe yose ya Politiki gushyira mu bikorwa amabwiriza yo kwirinda ikwirakwira ry’icyorezo cya Coronavirus.

Biteganyijwe ko amatora muri Uganda azaba tariki 14 Mutarama 2021, aho Perezida Yoweri Museveni azaba yiyamamariza indi manda nyuma y’imyaka isaga 3o ari ku butegetsi.

Bobi Wine ni umwe mu batavuga rumwe na Leta bakunze kwibasirwa n'inzego z'umutekano za Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .