00:00:00 IGIHE NETWORK KN KINYARWANDA EN ENGLISH FR FRANCAIS

Ethiopie: Abasaga 100 baguye mu mirwano y’amoko, abarimu batsembeye Museveni wabasabaga kureka imyigaragambyo: Amakuru yo mu karere

Yanditswe na IGIHE
Kuya 20 June 2022 saa 02:23
Yasuwe :

Imvururu zishingiye ku moko mu Burasirazuba bwa Ethiopie zasize abantu basaga 100 bishwe ndetse inzu zabo ziratwikwa, ku wa Gatandatu w’icyumweru gishize.

Abatangabuhamya babwiye BBC ko mu Karere ka Oromia, inyeshyamba ziharanira ukwibohoro kw’aka gace, Oromo Liberation Army (OLA) zagabye igitero mu gace gatuwemo n’abo mu bwoko bwa Amhara.

Inzu nyinshi zaratwitswe. Guverinoma y’ako karere yashinje inyeshyamba za OLA ubwo bugizi bwa nabi ariko zo zabihakanye zivuga ko ubutegetsi bubifitemo akaboko.

Minisitiri w’Intebe wa Ethiopie, Abiy Ahmed, yamaganye ubwo bwicanyi yise ko butemewe yongeraho ko guverinoma ye irajwe ishinga no kugarura amahoro n’umutekano.

Nubwo nta mibare ya nyayo irashyirwa ahagaragara ariko raporo zimwe zemeza ko abapfuye barenga 100.

Minisitiri w’Intebe anengwa intege nke mu gukemura ibibazo by’umutekano muke bigenda birushaho guhindura isura muri Ethiopie.

Imirwano hagati y'amoko yongeye guhitana ubuzima bw'abatari bake muri Ethiopie

U Bubiligi bwamaze gutanga iryinyo rya Lumumba

Ubutegetsi bw’u Bubiligi bwamaze gutanga iryinyo rya Patrice Lumumba burishyikiriza umuryango we mu muhango wabereye i Bruxelles.

Ni rwo rugingo rw’umubiri we bitekerezwa ko rugihari nyuma y’aho yishwe umurambo we ukajugunywa muri acide mu 1961.

U Bubiligi ni bwo bwari bwarakolonije Repubulika Iharanira Demokarasi ya Congo; bushinjwa ko bamwe mu bategetsi babwo bagize uruhare mu bikorwa byagejeje ku rupfu rwa Lumumba.

Itsinda ry’abantu boherejwe na Guverinoma ya RDC bari mu Bubiligi kuva ku Cyumweru cyashize aho bari bagiye kwakira iryinyo rye.

Iryo tsinda riyobowe na Minisitiri w’Intebe Jean-Michel Sama Lukonde, rikabamo Minisitiri w’itangazamakuru n’ubutabera hamwe na Minisitiri w’Umuco.

U Bubiligi bwamaze gutanga iryinyo rya Patrice Lumumba, ryashyikirijwe abarimo abo mu muryango we

Jya mu rugo ntushobora kuba Perezida-Ruto abwira Raila Odinga

Visi Perezida wa Kenya, William Ruto, yabwiye mugenzi we Raila Odinga bahatanye mu matora ya Perezida ateganyijwe tariki ya 9 Kanama uyu mwaka, ko akwiye kuba yimenyereza ubuzima bwo mu rugo kuko adateze gutsinda.

Yabivuze ku mu bikorwa byo kwiyamamaza by kuri iki Cyumweru byaranzwe n’imvururu hagati y’abashyigikiye impande zombi, zatumye Polisi itabara.

Ruto yibasiye bikomeye Raila Odinga amubwira ko bitazamugwa neza nahirahira kumena amaraso y’inzirakarengane z’Abanyakenya.

Ati “Kuri Raila Odinga, ndagusaba kuba witegura gusubira mu rugo kubera ko intsinzi ari iyacu muri iyi minsi 50 isigaye. Ntushobora gukomeza kumena amaraso y’Abanyakenya ugerageza kuba icyo udashobora kuba cyo. Wamennye amaraso menshi. Uracyashaka kongeraho andi? Ndagusaba kujya mu rugo.”

William Ruto yasabye Raila Odinga kuba yimenyereza ubuzima bwo mu rugo kuko adateze gutsinda amatora

Abarimu batsembeye Perezida Museveni wabasabye guhagarika imyigaragambyo

Ihuriro ry’abarimu bo mu mashuri ya leta muri Uganda, ryiyemeje gukomeza imyigaragambyo yamagana ubusumbanye mu mushahara nubwo Perezida Museveni yari yatanze amabwiriza abasaba gusubira mu kazi.

Mu itangazo ryashyizwe ahagaragara ku wa Gatandatu, tariki 18 Kamena, Perezida Museveni yari yasbaye abarimu bo mu gihugu hose guhagarika imyigaragambyo abizeza ko leta igiye gukemura ikibazo cy’imishahara mu byiciro.

Perezida Museveni yabonanye n’abanyamuryango b’ihuriro ry’abarimu mu biro bye, i Entebbe ariko Umunyamabanga mukuru w’iri huriro, Filbert Baguma yabwiye Daily Monitor ko umubonano wabo na Perezida utatanze umusaruro ikaba ari yo mpamvu bagomba gukomeza imyigaragambyo.

Yavuze ko gusubira mu kazi bizaterwa n’uburyo minisiteri y’abakozi ba leta n’iy’mari zizihutisha gahunda yo gusuzuma no kumenya niba ibizavamo bikuraho icyuho mu mishahara y’abarimu bose.

Umuvugizi wa Minisiteri y’Uburezi na siporo, Dr Dennis Mugimba, yashimangiye icyemezo cya Perezida cy’uko abarimu bigisha siyansi ari bo baherwaho ariko ko icyuho hagati y’abigisha siyansi n’andi masmo kidakwiye kuba kinini.

Biteganyijwe ko umushahara w’abarimu ba siyansi bafite diplome y’icyiciro ya A0 uzazamurwa ukava kuri miliyoni 1,2 z’amashilingi (ni nk’ibihumbi 329 Frw) ukagezwa kuri miliyoni enye (arenga miliyoni imwe y’amafaranga y’u Rwanda) naho ku bafite ‘dipolama’ bigisha aya amasomo umushahara wabo ukava ku bihumbi 950 ukagezwa kuri miliyoni eshatu z’amashilingi.

Abarimu bigisha andi masomo bafite A0 bahembwa 1.080.000 mu gihe abafite ‘diploma’ bigisha mu mashuri yisumbuye bahembwa 795.000 by’amashilingi.

Abarimu bo muri Uganda batangaje ko bagomba gukomeza imyigaragambyo nubwo Perezida Museveni yari yabasabye gusubira mu kazi abizeza ko ikibazo cyabo kizakemurwa

Misitiri ushinzwe amazi muri Sudani y’Epfo yapfiriye mu Misiri

Minisitiri ushinzwe umutungo w’amazi no kuhira imyaka, Manawa Peter Gatkuoth Gual yapfiriye mu Bitaro byo mu Misiri nk’uko byatangajwe na Guverinoma ya Sudani y’Epfo.

Visi Perezida wa mbere, Riek Machar, yatangaje ko uyu minisitiri yoherejwe mu Misiri ku wa Gatanu nyuma y’aho bigaragaye ko afite uburibwe mu gatuza.

Yabazwe ku wa Gatandatu hanyuma apfa ku Cyumweru mu gitondo nk’uko Machar yakomeje abivuga.

Mu butumwa bwo kwihanganisha umuryango we, Machar yagize ati “Manawa yabaye umuyobozi mwiza w’abanyeshuri ubw yari akiri muri kaminuza ndetse anayobora ihuriro ry’urubyiruko muri Sudani. Yari umuntu ukunda igihugu. Yabonaga icyerekezo mu mavugurura muri Sudani y’Epfo.”

Manawa Peter Gatkuoth Gual wari Minisitiri ushinzwe amazi muri Sudani y'Epfo yapfiriye mu Bitaro byo mu Misiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .