00:00:00 IGIHE NETWORK KN KINYARWANDA EN ENGLISH FR FRANCAIS

Avugwa muri Afurika: Eritrea mu bwoba bwa TPLF; buri masegonda 48 umuntu yicwa n’inzara...

Yanditswe na IGIHE
Kuya 18 May 2022 saa 10:20
Yasuwe :

Imiryango ikora ibikorwa by’ubugiraneza yatanze umuburo ko muri Ethiopie, Kenya na Somalia, buri masegonda 48 hapfa umuntu azize inzara y’akarande ifitanye isano n’umutekano muke, amapfa n’izamuka ry’ikiguzi cy’ubuzima.

Raporo y’Umuryango Oxfam na Save the Children ivuga ko ku isi hose abantu bagera kuri miliyoni 181 bazahura n’ibibazo by’inzara uyu mwaka kandi abagore nibo bazibasirwa cyane.

Iyi miryango ivuga ko iyi nzara ifitanye isano n’intege nke muri politiki ndetse ko abagera ku bihumbi 350 bashobora gupfa mu gihe ibihugu bikize bitagira icyo bikora mu maguru mashya.

Amapfa muri bimwe mu bihugu byo mu Burasirazuba bwa Afurika ari mu bitera inzara

Eritrea irashinja TPLF gutegura ibitero mu Murwa Mukuru Asmara

Intambara iratutumba ku mupaka wa Ethiopie na Eritrea ndetse ubutegetsi bwa Eritrea bufite ubwoba ko Tigray (TPLF) iri mu myiteguro yo kugaba ibitero mu Murwa Mukuru Asmara.

Ibirego bya Eritrea kuri uyu wa Kabiri byaje nyuma y’iminsi inyeshyamba za TPLF n’ingabo z’iki gihugu zirwaniye mu bice bya Badme na Rama, imijyi iri ku mipaka y’ibihugu byombi.

Minisitiri ushinzwe iby’itangazamakuru muri Eritrea yatangaje k0 atari ibanga ko ingabo za TPLF zirimo zitegura ibitero bishya.

Ati “Intego yabo nyamukuru ni ugusubirana ubutaka amategeko mpuzamahanga yemera ko ari ubwa Eritrea no gukora ibikorwa bishingiye ku rwango n’ubunyamaswa ku butaka bwa Eritrea.”

Yakomeje avuga ko TPLF ishyigikiwe n’ibihugu byo mu Burayi biyitera inkunga irimo ibiribwa, imiti n’ibikomoka kuri peteroli byitwaje ko biri gutabara abari mu kaga.

Imibanire mibi hagati ya Tigray na Eritrea yarushijeho kujya irudubi mu 2020, nyuma y’aho Perezida Isaias Afwerki yohereje ingabo muri Ethiopie ngo zitange umusanzu mu kurwanya TPLF.

Nk’uko inkuru ya The Eastafrican ikomeza ibivuga, Minisitiri w’itangazamakuru yemeje ko Abanya-Eritrea bazakora ibishoboka bakirwanaho mu gihe bagabwabo ibitero n’uwo ari we wese.

Umuryango mpuzamahanga umaze igihe wihanagiriza Eritrea ngo ikure ingabo zayo muri Tugray, agace ko mu Majyaruguru ya Ethiopie.

TPLF irashinjwa imyiteguro yo kugaba ibitero muri Eritrea

Igisirikare cya Mali cyafashe Colonel Amadou Keita ushinjwa kugerageza guhirika ubutegetsi

Colonel (Amadou) Keita wari mu bantu ba hafi y’itsinda ry’abasirikare bafashe ubutegetsi muri Mali, yatawe muri yombi ashinjwa kugerageza Coup d’Etat.

Ku wa Mbere nibwo igisirikare cya Mali cyatangaje ko mu cyumweru cyashize cyabuirijemo umugambi wo guhirika ubutegetsi wari uyobowe n’abasirikare bakuru ndetse igihugu cy’I Burayi kitatangajwe kikaba cyari gifitemo akaboko.

Umwe mu bayobozi muri Minisiteri y’ingabo muri Mali yabwiye Ibiro Ntaramakuru by’Abafaransa, AFP ko Colonel Amadou Keita ari mu batawe muri yombi.

Ni umusirikare utari uzwi cyane ariko yari ari mu itsinda ry’abagera ku 120 bari mu kanama k’inzibacyuho, urwego rwashyizweho ngo rutegure amategeko aganisha ku gusubiza ubutegetsi mu maboko y’abasivile.

Yari kandi umuntu wa hafi wa Perezida w’aka kanama, Colonel Malick Diaw, umwe mu bavuga rikumvikana muri aba basirikare barangajwe imbere na Colonel Assimi Goita nk’uko Voanews yabitangaje.

Umusirikare ufite ipeti rya Colonel yafashwe ashinjwa kugerageza guhirika ubutegetsi

Inka z’Abanyankore zashyizwe mu kigo cyita ku nyamaswa cyo muri Amerika

Inka zo muri Ankole muri Uganda zizwi nka Ankole cattle zagejejwe mu kigo gikomeye cyita ku nyamaswa cyo muri Leta Zunze Ubumwe za Amerika, The Philadelphia zoo.

Izi nka z’amahembe maremare zizwi nka Ankole watusi, zifite igisobanuro gikomeye mu muco w’Abanyankole dore ko zifatwa nk’inka z’ibwami.

BBC yatangaje ko umwihariko w’izi nka azi amahembe yazo ashobora gupima ibilo birindwi buri rimwe.

Ubuyobozi bwa The Philadelphia zoo bwatangaje ko bwishimiye kuba inyambo zo muri Ankole, zinjijwe muri icyo kigo kimaze imyaka 163 kibayeho, kikaba icya mbere cyita ku nyamaswa cyabayeho mu mateka ya Leta Zunze Ubumwe za Amerika.

The Philadelphia zoo yatangaje ko bizeye ko bizongera umubare w’abasura icyo kigo ndetse bakanarushaho kuryoherwa no kureba inyamaswa zitandukanye.

Inka eshatu The Philadelphia zoo yahawe zifite amazina arimo Yamaani, Gaaju na Kutekaana.

Izi nka zizwiho kugira amahembe maremare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .