EAC yatangije Urubuga ruzorohereza ba rwiyemezamirimo b’abagore muri Afurika kugera ku makuru y’ubucuruzi

Yanditswe na Dufitumukiza Salathiel
Kuya 31 Kanama 2020 saa 04:17
Yasuwe :
0 0

Umuryango w’ibihugu byo muri Afurika y’iburasirazuba,EAC watangije ku mugaragaro urubuga rwitwa 50 Million African Women Speak Networking Platform (50MAWS), rwitezweho kongerera ba rwiyemezamirimo b’abagore bo muri Afurika ubushobozi bwo guhanga no kwagura imishinga ya bo,ndetse no kubona ahari amahirwe y’ishoramari.

Ni urubuga rugizwe n’ibice bibiri aho mu gice cya mbere, aba bagore bazajya bahasanga amakuru ajyanye n’ubucuruzi, uko bagera kuri serivisi z’imari n’isoko, ubwikorezi ndetse n’ay’andi yose yafasha mu bucuruzi bwabo.

Muri iki gice kandi hazajya haboneka amakuru ajyanye n’iteganyagihe,amasomo ajyanye no kwihangira imirimo ndetse n’inkuru z’abandi bagore babashije kugira aho bigeza.

Mu gice cya kabiri cy’uru rubuga hazaba hari abo abagore bashobora guhurira bakamenya ndetse bakungurana ibitekerezo ku bintu bitandukanye.

Ubwo uru rubuga rwatangizwaga muri Tanzania, Umunyamabanga wa EAC, ushinzwe Imari n’Ubutegetsi, Bazivamo Christophe yavuze ko urubuga 50MAWS rwubatswe hagendewe ku makuru ari mu gihugu no mu Karere; bityo rukaba rufite amakuru y’ahegereye abacuruzi n’uko bagera ku isoko ry’Akarere.

Bazivamo yavuze ko kandi uru rubuga ruzafasha ba rwiyemezamirimo b’abagore mu kumenyekanisha ibikorwa byabo.

Yagize ati “Ndizera ko abagore bafite imishinga bari hano uyu munsi basanzwe bamenyekanisha ibyo bakora bifashishije imbuga nkoranyambaga nka Instagram,Facebook n’izindi zikoreshwa ku Isi yose.Amakuru meza uyu munsi nuko tugiye kubifashwamo n’urubuga rw’iwacu.”

Ba rwiyemezamirimo b’abagore babyifuza bazajya bajya kuri uru rubuga banyuze kuri www.womenconnect.org, ubundi bakurikize amabwiriza.

Minisitiri w’ubuzima,iterambere,uburinganire muri Tanzania, Ummy Mwalimu nawe wari witabiye uyu muhango yavuze ko gushyira mu bikorwa uyu mushinga ari amahirwe abagore bo mu karere babonye yo kubaka neza ubukungu bwa bo.

Yagize Ati ”Gushyira uyu mushinga mu bikorwa ni imbaraga zikomeye abagore bo Karere bahawe.”

Umushinga wo gushyiraho uru rubuga wagenwagwa n’ingingo ya 122 y’amasezerano y’ishyirwaho rya EAC, igamije kongerera ubushobozi uruhare rw’umugore mu bikorwa by’ishoramari.

Uyu mushinga mushinga uzakorera mu bihugu 38 bya Afurika,washyizwe mu bikorwa na EAC ku bufatanye na COMESA na ECOWAS ku nkunga ya banki Nyafurika isura Amajyambere(AfDB); nyuma yo kumurikwa mu nama ya Global Gender Summit yabereye i Kigali mu Gushyingo 2019. Ibi bihugu 38 bikaba ari ibigize imiryango yavuzwe haruguru.

Uru rubuga rwitezweho kuzafasha abagore bo muri Afurika kugera ku makuru y'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .