00:00:00 IGIHE NETWORK KN KINYARWANDA EN ENGLISH FR FRANCAIS

EAC iri hafi gukabya inzozi z’ifaranga rimwe; Mozambique n’u Burusiya byemeranyijwe kunoza umubano: Ibivugwa mu Karere

Yanditswe na IGIHE
Kuya 2 June 2022 saa 01:59
Yasuwe :

Perezida wa Sena y’u Burusiya, Valentina Matviyenko yagiriye uruzinduko rw’iminsi ibiri muri Mozambique aho ibihugu byombi byemeranyijwe ko bigiye kunoza ubufatanye bwabyo.

Impande zombi zashyize umukono ku masezerano agamije guha imbaraga ubwo bufatanye hagati y’Inteko Zishinga Amategeko nko mu bijyanye no guhererekanya amakuru.

Valentina Matviyenko, yashimye Mozambique ayita umufatanyabikorwa w’imena anagaruka ku nkunga ubutegetsi bwa Moscow bwateye iki gihugu mu myaka yashize.

Ubwo bufasha burimo ubwo mu gihe cy’ubukoloni ubwo icyo gihugu cyashakaga kuva mu kwaha kw’Abanya-Poltugal bwo gutanga imyitozo ku Banyamozambique mu Burusiya.

Mozambique iri mu bihugu 58 byifashe mu Nteko Rusange ya Loni ubwo hatirwaga umwanzuro wo guhagarika u Burusiya mu Kanama ka Loni gashinzwe uburenganzira bwa muntu kubera intambara bwashoje muri Ukraine.

EAC yaba iri hafi gukabya inzozi zo kugira ifaranga rimwe

Minisitiri ushinzwe ibikorwa by’Umuryango wa Afurika y’Iburasirazuba (EAC), Rebecca Kadaga, yatangaje ko ibintu nibikomeza kugenda uko byagenwe, uyu muryango uzaba ufite ifaranga rimwe mu 2024.

Minisitiri Kadaga yabigarutseho mu nama y’ubucuruzi hagati ya Uganda na Repubulika Iharanira Demokarasi ya Congo nk’uko Daily Monitor yabitangaje.

Yavuze ko ibihugu biri muri uyu muryango biri gukorana harebwa ibikenewe mu guhitamo igihugu kizakira Ikigo cya Afurika y’Iburasirazuba gishinzwe iby’ifaranga ari na cyo bizarangira kibaye Banki Nkuru y’uyu muryango.

Yagize ati “Bitarenze umwaka wa 2024, tuzaba twamenye igihugu kizakira ikigo gishinzwe iby’amafaranga. Icyo kigo ni cyo kizahinduka Banki Nkuru ya Afurika y’Iburasirazuba. Twizeye ko nibigenda nk’uko biteganyijwe 2024 izarangira dufite ifaranga rimwe.”

Kadaga yavuze ko kugeza ubu Uganda, Tanzania, u Burundi na Kenya byamaze gutanga ubusabe bwo kwakira icyo kigo.

Umuryango wa Afurika y’Iburasirazuba ugizwe n’ibihugu birimo Uganda, u Rwanda, u Burundi, Tanzania, Kenya, Sudani y’Epfo na Repubulika Iharanira Demokarasi ya Congo yinjiyemo muri Mata uyu mwaka.

Perezida Ramaphosa yajyanywe mu butabera ashinjwa kwiyibisha

Uwahoze ari umuyobozi w’urwego rw’ubutasi muri Afurika y’Epfo, yajyanye mu nkiko Perezida w’iki gihugu, Cyril Ramaphosa amushinja ibyaha birimo gushimuta no kugurira abajura ngo bibe amamiliyoni mu mitungo ye.

Arthur Fraser ashinja perezida kuba inyuma y’igikorwa cy’ubujura aho agatsiko k’abagizi ba nabi kinjiye mu mitungo ye kagafatwa kamaze kwiba miliyoni enye z’Amadolari.

Yavuze ko abakekwa bashimuswe bakishyurwa kugira ngo be kuzatanga amakuru kuri iri sanganya ryabaye ku wa 9 Gashyantare 2020.

Ibiro bya Perezida byatangaje ko Ramaphosa yamenyeshejwe iby’icyo kirego kandi ko azisobanura mu gihe gikwiye nk’uko BBC ibivuga.

Uyu mugabo watanze ikirego yavuze ko yahaye polisi ibimenyetso birimo amafoto, konti za banki, amashusho yafashwe n’amazina.

Polisi yabwiye itangazamakuru ko ikirego cyakiriwe ndetse ko urubanza rwa perezida rugiye gukurikiraho.

Perezida wa Afurika y'Epfo, Cyril Ramaphosa agiye kujyanwa mu nkiko

LONI yavuze ko M23 ikwiye gufatirwa imyanzuro mu maguru mashya

Intumwa yihariye y’Umuryango w’Abibumbye muri Afurika, Bintou Keita, yavuze ko hakwiye ‘igisubizo cyihuta mu bya gisirikare’ mu kurangiza ibitero bya M23.

Bintou yashimye uruhare rw’ingabo za LONI n’iza RDC mu kugarura agahenge muri teritwari za Nyiragongo na Rutshuru nyuma y’igihe zirimo imirwano.

Ku wa Gatatu ubwo yari i Goma, yavuze ko kurangiza ikibazo giterwa n’inyeshyamba bishoboka binyuze mu bikorwa bya gisirikare bigamije kurwanya M23, inzira za politiki bigizwemo uruhare n’akarere ndetse kwambura intwaro abarwanyi no kubasubiza mu buzima busanzwe.

M23 isaba leta ya RDC gushyira mu bikorwa amasezerano y’amahoro yashyiriweho umukono i Nairobi mu 2013 ariko yo ifata uyu mutwe nk’uw’iterabwoba ndetse yanze guhurira na wo mu biganiro.

Bintou Keita yavuze ko M23 ikwiye gufatirwa ingamba byihuse

Nigeria: Hishyuwe miliyoni 240 z’amadolari ngo umuyobozi wa Methodiste wari washimuswe arekurwe

Umuyobozi w’Itorero Methodiste muri Nigeria, Samuel Kanu, yatangaje ko hishyuwe ibihumbi 240 by’amadolari kugira ngo arekurwe hamwe n’abandi bantu babiri bari bashimutiwe hamwe.

Dr Kanu yashimuswe ku Cyumweru ubwo yari mu nzira ava mu materaniro mu Majyepfo ashyira uburengerazuba bwa Nigeria ari kumwe n’abapasiteri babiri. Yarekuwe nyuma y’amasaha 24.

Yabwiye BBC ko yatewe ubwoba ko azicwa hamwe na bagenzi be nibatishyura ikiguzi basabwaga kandi ko yabonye ahantu hajugunywe imibiri y’abishwe mbere.

Kugira ngo barekurwe Itorero rye ngo ni ryo ryakusanyije miliyoni 240 z’amadolari ashyikirizwa abari bamufashe.

Abapadiri babiri bo muri Kiliziya Gatolika bashimutiwe mu Majyaruguru ya leta ya Katsina mu cyumweru gishize baracyari mu maboko y’ababashimuse nk’uko BBC inkuru ya BBC ibivuga.

Umuyobozi w’Itorero Methodiste muri Nigeria, Samuel Kanu yavuze ko yishyuriwe ibihumbi 240 by'amadolari kugira ngo arekurwe n'abamushimuse

Tanzania: Tundu Lissu uri mu buhungiro yishyuriwe imyenda na Leta

Guverinoma ya Tanzania yishyuye umunyapolitiki utavuga rumwe n’ubutegetsi, Tundu Lissu, amafaranga yari agenewe, uyu akaba yarakuwe mu Nteko Ishinga Amategeko mu 2019 ku butegetsi bwa Pombe Magufuli.

Lissu wungirije umuyobozi w’ishaka rikuru ritavuga rumwe n’ubutegetsi Chadema, yari umwe mu bantu banengaga bikomeye imitegekere ya Perezida Magufuli.

Yahunze mu 2017 nyuma yo kuraswa agakomeretswa n’abantu batazwi mu Murwa Mukuru Dodoma.

Yakuwe mu nshingano ze ubwo yari akiri kwivuza mu mahanga.

Kuri uyu wa Gatatu yabwiye itangazamakuru ko aherutse kumva telefone y’umuyobozi wo muri minisiteri y’imari imuhamagara akamumenyesha ko amafaranga yasabaga guhabwa yayishyuwe.

Lissu yavuze ko yanishyuriwe imyenda yo muri banki.

Ati “Nari mfite imyenda mu mabanki abiri kandi imwe yari yajyanye ikirego mu rukiko isaba kwishyurwa ariko ubu ingaruka zakuweho, icyo nabwira abantu ni uko guverinoma iyobowe na Samia Suluhu yakemuye ibibazo by’ayo madeni.”

Tundu Lissu yavuze ko leta yamwishyuriye amadeni yari afite muri banki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .