EAC ifitiye u Bushinwa umwenda wa miliyari $29.4 yashowe mu bikorwa remezo

Yanditswe na Ishimwe Israel
Kuya 15 Ukwakira 2018 saa 02:47
Yasuwe :
0 0

Ibihugu byo muri Afurika y’Iburasirazuba byagujijwe miliyari $29.42 n’u Bushinwa mu kuzamura ubwikorezi, itumanaho, gutunganya ibikomoka mu nganda n’ibijyanye n’ingufu kuva mu myaka 10.

Ikigo cy’Ubushakashatsi mu mikoranire ya Afurika n’u Bushinwa (Cari) cyo muri Kaminuza ya John Hopkins cyagaragaje ko Ethiopia ifite u Bushinwa umwenda wa miliyari $13.73; Kenya ni miliyari $9.8; Uganda ni miliyari $2.96 na Tanzania ifite miliyari $2.34.

Ibihugu byafashe inguzanyo nto birimo u Rwanda rufite miliyoni $289; Sudani y’Epfo ni miliyoni $182 mu gihe u Burundi ari miliyoni $99.

Abasesenguzi bavuga ko ibihugu byo muri EAC bifite umutwaro wo kwishyura 8% ku nguzanyo byahawe.

Umuyobozi wa Cari, Deborah Brautigam, yatangarije The EastAfrican ko ibihugu bya Afurika bigorwa no kwita ku nyungu izazanwa n’imishinga.

Yagize ati “Ni ingenzi kureba ko iyo mishinga izahanga imirimo izafasha kwishyura izo nguzanyo aho kubibona nk’umuhango wo gutaha ibikorwa gusa.”

Ubushakashatsi bwa The EastAfrican bugaragaza ko inguzanyo yatanzwe yifashishijwe mu bwikorezi, ingufu, itumanaho n’ibyo gutunganya ibikorerwa mu nganda.

Ethiopia yafashe inguzanyo nini mu 2013 (miliyari $6.62) mu mishinga irimo uwo kubaka umuhanda wa gari ya moshi uyihuza na Djibouti n’uwo kwagura uduce twahariwe inganda.

Mu 2014, Kenya yahawe miliyari $3.7. Ubwikorezi muri Kenya bwatwaye miliyari $5.55 mu kubaka umuhanda uva Mombasa ugana Naivasha. Iki gihugu cyagujije miliyoni $597 mu mishinga y’ingufu.

Mu bindi bihugu, Sudani y’Epfo yakiriye miliyoni $158 mu bwikorezi na miliyoni $24 mu mishinga y’ingufu.

Urwego rw’ingufu muri Tanzania rwashowemo miliyari $1.16. Perezida John Pombe Magufuli ku butegetsi bwe igihugu cyahawe miliyoni $552 mu bijyanye n’itumanaho.

Uganda yo yahawe miliyari $1.92 azifashishwa mu bijyanye n’ingufu mu gihe ubwikorezi bwatwaye miliyoni $762. Inguzanyo y’u Rwanda ingana na miliyoni $151 mu bijyanye n’ubwikorezi.

Muri Nzeri, Ethiopia yongerewe igihe cyo kwishyura inguzanyo ya miliyari $4 iva ku myaka 10 ishyirwa kuri 30, icyemezo Minisitiri w’Intebe, Abiy Ahmed yashimangiye ko kizorohereza igihugu.

Perezida Uhuru Kenyatta ubwo yitabiraga Inama ihuza Afurika n’u Bushinwa yabereye i Beijing muri Kanama yakomoje ku koroherezwa kwishyura miliyari $3.8 yashowe mu mishinga ya gari ya moshi.

Mu nguzanyo zatanzwe, Banki ya Exim yagennye miliyari $16.3; iy’Iterambere mu Bushinwa yageneye EAC arenga miliyari $6.9 mu gihe abandi bazishyurwa miliyari $6.1.

Ibigo byo mu Bushinwa na Banki zigenga byagujije ibihugu bya Afurika miliyari $143 mu myaka 17 ishize.

Inguzanyo y'u Bushinwa muri EAC ikoreshwa mu kubaka ibikorwa remezo birimo n'imihanda ya gari ya moshi ihuza ibihugu byo mu Karere
Amadeni ibihugu byo muri EAC byafashe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza