00:00:00 IGIHE NETWORK KN KINYARWANDA EN ENGLISH FR FRANCAIS

COVID-19 yafashe indi ntera muri Uganda

Yanditswe na IGIHE
Kuya 10 June 2022 saa 10:32
Yasuwe :

Guverinoma ya Uganda ihangayikishijwe n’ubwandu bwa COVID-19 burimo kwiyongera cyane , nubwo impungenge z’abashobora gupfa ziri hasi cyane kubera ko ibyiciro bifite ibyago byinshi byamaze gukingirwa.

Ibipimo 2675 byafashwe ku wa 8 Kamena 2022 byaje kugaragaza ubwandu bushya mu bantu 119, bingana na 4,4% by’abanduye, ugereranyije n’abapimwe.

Ni ubwandu burimo kuzamuka cyane mu gihe ingamba hafi ya zose zo kwirinda icyorezo cya COVID-19 muri Uganda zamaze koroshywa, cyane cyane amahuriro y’abantu benshi.

Mu bipimo 3274 byafashwe ku wa 7 Kamena 2022, nabwo habonetsemo abanduye 124, bingana na 3,8%.

Minisitiri w’Ubuzima Dr. Jane Ruth Aceng, aheruka kuvuga ko ubwandu burimo kugaragara muri iyi minsi buruta ubwabonetse mu kindi gihe, kuva muri Mutarama 2022.

Ati "Iri zamuka ry’ubwandu risa n’iryabayeho muri Kamena 2021, ubwo coronavirus yihinduranyije ya Delta yari yiganje. Ariko nk’igihugu, twiteguye neza guhangana n’iri zamuka nbdetse no kurengera ubuzima kurusha uko byari bimeze mbere."

Yasabye abaturage gukaza ingamba zo kwirinda, bakihutira kwikingiza, bakambara udupfukamunwa igihe cyose by’umwihariko abasanganywe ibibazo by’ubuzima, kandi bagakaraba intoki inshuro nyinshi.

Kugeza ubu abantu bamaze kwandura COVID-19 muri Uganda ni 166.046, mu gihe abapfuye ari 3600. Abakize ni 100.385 naho abarembeye mu bitaro ubu ni batandatu.

Abantu bakingiwe bose hamwe ni miliyoni 21,4 mu baturage barenga miliyoni 40.

Minisitiri w’Ubuzima muri Uganda, Dr. Jane Ruth Aceng, yasabye abaturage kwitwararika kurushaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .