COVID-19: Amerika yaburiye abaturage bayo, ibabuza gukorera ingendo muri Tanzania

Yanditswe na IGIHE
Kuya 2 Ukuboza 2020 saa 07:38
Yasuwe :
0 0

Leta Zunze Ubumwe za Amerika zaburiye abaturage bayo kwirinda gukorera ingendo muri Tanzania kuko bibashyira mu kaga ko kwandura COVID-19, inasaba abajyayo kwitwararika bakubahiriza amabwiriza yo kwirinda iki cyorezo.

Mu itangazo Ikigo cyo muri iki gihugu gishinzwe kurwanya indwara z’ibyorezo (CDC) cyashyize hanze kuri uyu wa Gatatu cyasabye Abanyamerika gukora ibishoboka byose bakirinda kujya muri Tanzania, aho bibaye ngombwa ko bajyayo bakitwararika amabwiriza yashyizweho n’inzego z’ubuzima mu kwirinda C0VID-19, iterwa n’agakoko ka Coronavirus.

Rigira riti “Abakora ingendo bakwiye kwirinda kujya muri Tanzania. Kuhagirira urugendo bishobora ku kongerera ibyago byo kwandura no gukwirakwiza COVID-19.”

Iri tangazo rije nyuma y’uko ubuyobozi bwa Perezida John Pombe Magufuli bwagiye bunengwa kubera kujenjekera iki cyorezo, bwumvisha abaturage ko nta nkeke giteye ndetse ko na n’impamvu zo kubahiriza amabwiriza yo kucyirinda.

Mu gihe ibindi bihugu byashyize imbaraga mu kubahiriza ingamba zo kwirinda COVID-19, muri Tanzania ho ubuzima bwarakomeje nk’uko bisanzwe, imikino n’ibitaramo biraba kandi bikitabirwa ku bwinshi ndetse hatubahirijwe ingamba zo kwirinda iki cyorezo.

Kuva icyorezo cya COVID-19 cyaboneka bwa mbere muri Tanzania, abantu 509 baracyanduye, 183 baragikize mu gihe 21 bitabye Imana. Minisiteri y’Ubuzima muri iki gihugu ntiheruka gutangaza ubwandu bushya bw’abafite iki cyorezo cyangwa abahitanwa nacyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .