Côte d’Ivoire yabaye igihugu cya kabiri cyakiriye inkingo muri gahunda ya Covax

Yanditswe na Muhonzire Sylvine
Kuya 27 Gashyantare 2021 saa 11:24
Yasuwe :
0 0

Côte d’Ivoire yabaye igihugu cya kabiri nyuma ya Ghana cyakiriye inkingo za Coronavirus muri gahunda ya Covax yo kugeza inkingo kuri bose yatangijwe n’ishami ry’Umuryango w’Abibumbye ryita ku buzima, OMS, ku bufatanye na Komisiyo y’ibihugu by’u Burayi hamwe n’u Bufaransa.

BBC ivuga ko iki gihugu cyakiriye dose ibihumbi 500 z’inkingo za Astrazeneca zahageze zivuye mu Buhinde.

Minisitiri w’Ubuzima muri iki gihugu, Eugene Aka Aouélé, yishimiye ko inkingo zageze mu gihugu cye, ndetse avuga ko bagiye guhashya icyorezo mu buryo bwa demokarasi.

Yagize ati “Iyi ni intambwe ikomeye mu gufatanya kurwanya umwanzi wacu twese. Uwo nta wundi ni Covid-19.”

“Iki cyorezo kibasiye Isi ku rwego rwo hejuru kandi n’igihugu cyacu ntabwo cyasigaye. Abantu barenga ibihumbi 32 batuye muri Côte d’Ivoire banduye iki cyorezo, muri bo 188 barapfa. Iki ni ikiza.”

Mu cyumweru gitaha nibwo biteganyijwe ko iki gihugu kizatanga inkingo gihereye ku bakora mu nzego z’ubuzima, abarimu ndetse n’abakora mu nzego z’umutekano.

Ku wa Gatatu w’iki cyumweru nibwo Ghana yabaye iya mbere mu bihugu bizakira inkingo muri gahunda ya Covax, aho yahawe dose ibihumbi 600 z’inkingo za Astrazeneca.

Biteganyijwe ko ibihugu 145 aribyo bizahabwa inkingo muri gahunda ya Covax n’u Rwanda rurimo. Inkingo zizatangwa ni izakozwe n’uruganda rwa Pfizer-BioNTech ndetse na AstraZeneca, aho biteganyijwe ko hazatangwa inkingo miliyoni 40.

U Rwanda ruzahabwa inkingo 1 098 960. Mu karere ruherereyemo u Burundi na Tanzania ntibizahabwa inkingo, ariko Uganda yo izazihabwa zingana na 3 552 000 mu gihe Repubulika Iharanira Demokarasi ya Congo izabona 6 948 000 naho Kenya ikabona inkingo 4 176 000, zose zakozwe na AstraZeneca.

COVAX ifite intego yo kuzageza inkingo 20% mu bihugu binyamuryango bitarenze uyu mwaka.

Uko inkingo zizatangwa muri Afurika muri gahunda ya Covax / Ifoto: DOT
Côte d'Ivoire yahawe inkingo za Astrazeneca ibihumbi 500 muri gahunda ya Covax / Ifoto: EPA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .