Citizen TV yifatiye ku gahanga Amerika nyuma yo kuburira abaturage bajya muri Kenya kubera COVID-19

Yanditswe na IGIHE
Kuya 4 Ukuboza 2020 saa 09:42
Yasuwe :
0 0

Citizen TV yo muri Kenya yifatiye ku gahanga Leta Zunze Ubumwe za Amerika ku gahanga, iyibwira ko bitewe ni kigero yugarijweho na Covid-19 itagakwiye kuba isohora amatangazo abuza abaturage bayo kujya muri Kenya ngo batahandurira iki cyorezo.

Ibi Citizen TV ibitangaje nyuma y’uko mu ntangiriro z’iki cyumweri Ikigo cya Leta Zunze Ubumwe za Amerika gishinzwe kurwanya ibyorezo (CDC) cyasohoye itangazo kiburira abaturage b’iki gihugu kutajya muri Tanzania na Kenya kuko baba bishyira mu byago byo kwandura Covid-19.

Muri iri tangazo iki kigo cyasabye ko n’umuturage byaba ngombwa ko ajya muri ibyo bihugu, yitwararika cyane akubahiriza amabwiriza yo kwirinda Covid-19.

Iri tangazo ryabaye nk’iridashimisha Citizen TV maze umunyamakuru wayo, Benjamin Muriuki yiva inyuma akora inkuru ifite umutwe ugira uti “Amerika ifite abapfuye ibihumbi 270 n’abanduye miliyoni 13 yabujije abaturage kujya muri Kenya kubera ko byabashyira mu byago byo kwandura Covid-19.”

Muri iyi nkuru uyu munyamakuru agaragaza ko Amerika itakabaye ibwira abantu ko bafite ibyago byinshi byo kwandura Covid-19 igihe bagiye mu bindi bihugu kandi ariyo yugarijwe.

Agaragaza kandi ko Amerika aricyo gihugu gipfusha abantu benshi ku munsi bahitanywe n’iki cyorezo. Muriuki agaragaza ko inzego z’ubuzima muri Amerika zimaze iminsi zitaka ko zitagifite ubushobozi bwo kwakira umubare munini w’abarwayi, agaheraho yemeza ko ahubwo muri Amerika ariho umuntu aba ari mu byago byinshi byo kwandura Covid-19 kurusha ahandi hose ku Isi.

Inkuru y’uyu mugabo yazamuye n’amarangamutima y’abakoresha imbuga nkoranyambaga, bamwe bamushimira kuba atinyutse gutanga igitekerezo cye muri ubu buryo ari nako banibaza icyateye Amerika gusohora itangazo nk’iri kandi nayo izi ibibazo ifite.

Nubwo hari abashyigikiye uyu munyamakuru, hari n’abandi bagaragaje ko Amerika nta kosa yakoze mu kuburira abaturage bayo, bakemeza ko gupima Covid-19 muri bimwe mu bihugu bya Afurika bikiri hasi, ibintu byarushaho gushyira mu kaga ubuzima bw’abayigenderera kuko umuntu atabasha kumenya neza urwaye n’utwarwaye.

Kugeza ubu Kenya ifite abanduye Covid-19 barenga ibihumbi 86 n’abo imaze guhitana basaga 1500, mu gihe muri Leta Zunze Ubumwe za Amerika abamaze kwandura babarirwa muri miliyoni 14 n’abarenga ibihumbi 270 cyahitanye.

Citizen TV yakoze inkuru igaragaza ko itashimishijwe n'ibyavuzwe na Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .