Bwa mbere mu Burundi hagaragaye abarwayi babiri ba Coronavirus

Yanditswe na IGIHE
Kuya 31 Werurwe 2020 saa 09:32
Yasuwe :
0 0

Minisitiri w’Ubuzima mu Burundi, Ndikumana Thaddée, yatangake ko ku nshuro ya mbere mu gihugu cye hagaragaye abarwayi babiri bafite ubwandu bwa COVID-19 iterwa n’agakoko ka Coronavirus.

U Burundi nicyo gihugu cyo mu Karere ka Afurika y’Uburasirazuba cyari gisigaye kitarabonekamo umurwayi wa Coronavirus.

Mu kiganiro n’itangazamakuru, Minisitiri w’Ubuzima mu Burundi, Ndikumana, yavuze ko Abarundi babiri basanganywe Coronavirus barimo uw’imyaka 56 n’uwa 42 binjiye mu gihugu bavuye hanze.

Yagize ati “Ibitaro byo mu Giteranyi byakiriye abantu batatu baje bava muri Tanzania. Muri Buremec naho bari abantu babiri. Ibipimo byerekanye ko abo batatu baje bava muri Tanzania nta Coronavirus barwaye. Mu bitaro bya Buremec hari abantu babiri bagiye kuhivuriza, uwa mbere ni Umurundi w’imyaka 56 uba i Bujumbura akaba yari yatashye avuye mu Rwanda. Undi na we afite imyaka 42 uba i Bujumbura akaba yaherukaga i Dubai anyuze mu Rwanda."

MinisitiriNdikumana yasabye Abarundi kwitwararika isuku no kutegerana mu rwego rwo kwirinda ikwirakwira rya Coronavirus.

Mu minsi ishize Tanzania yatangaje ko umwe mu barwayi babonetse ku butaka bwayo ari umushoferi wanyuze mu mu Burundi ariko Minisiteri y’Ubuzima mu Burundi yahise itangaza ko iperereza ku makuru y’uko uyu murwayi yari aturutse muri icyo gihugu, iyagendera kure.

Abarwayi basanganywe Coronavirus bari bagiye kwivuza bafite ibimenyetso bya Coronavirus, birimo inkorora. Abo bahise bajyanwa mu Bitaro byitiriwe Igikomangoma Louis Rwagasore ahateganyijwe kwita ku barwayi ba Coronavirus.

Kuri ubu abarwayi nta kibazo gikomeye bafite. U Burundi bwari bwatangaje ku wa 28 Werurwe 2020 ko bwari bwasuzumye abantu bane ariko bose basanga ari bazima.

U Burundi bwahagaritse ingendo z’indege mu byumweru bibiri ndetse bunafunga imipaka mu gukumira urujya n’uruza rw’abantu bashobora kubwinjizamo Coronavirus.

Umuryango uharanira Uburenganzira bwa Muntu Human Rights Watch uheruka kugaragaza impungenge utewe no kuba mu Burundi hashobora kuba hadatangwa amakuru mpamo kuri Coronavirus, uvuga ko abayobozi gushyira ubuzima bw’abaturage mu kaga.

HRW ivuga ko mu 2019, u Burundi bwanze gutangaza ko Malaria yabwibasiye mu gihe habonetse abantu miliyoni 8,5 bayirwaye mu gihugu gifite miliyoni 11,5 ikica abantu barenga 3,000.

Coronavirus yagaragaye mu Burundi mu gihe muri Gicurasi hitegurwa amatora rusange y’Umukuru w’Igihugu y’ugomba gusimbura Perezida Pierre Nkurunziza ku butegetsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .