Buyoya wayoboye u Burundi yahishuye impamvu afatwa nk’umwanzi w’ubutegetsi bwa Nkurunziza

Yanditswe na Bukuru JC
Kuya 9 Ukuboza 2019 saa 04:25
Yasuwe :
0 0

Pierre Buyoya wahoze ari Perezida w’u Burundi, yahishuye ko Guverinoma ya Pierre Nkurunziza, imufata nk’umwanzi wayo nimero ya mbere kubera ko ari uwo mu bwoko bw’Abatutsi kandi akaba akorana n’imiryango mpuzamahanga aho ari mu mahanga.

Uyu mugabo avuga ko guverinoma ya Nkurunziza yashyizeho impapuro zo kumuta muri yombi imushinja kugira uruhare mu rupfu rwa Melchior Ndadaye, wahoze ari Perezida w’u Burundi ku mpamvu za politiki no gukuza amacakubiri.

Mu mpera za 2018 nibwo Umushinjacyaha mukuru w’icyo gihugu, Sylvestre Nyandwi, yasohoye impapuro zo guta muri yombi Pierre Buyoya n’abandi 16 bari abayobozi bukuru, bashinjwa uruhare mu rupfu rwa Melchior Ndadaye wishwe mu 1993, ayobora icyo gihugu.

Uyu mugabo wabaye Perezida w’u Burundi inshuro ebyiri, uyu munsi ni intumwa y’Umuryango wa Afurika Yunze Ubumwe muri Mali, aho aba guhera mu 2012.

Buyoya yabwiye Jeune Afrique ko kumushinja ibyo kwica Ndadaye nyuma y’imyaka 25 ari impamvu za Politiki.

Yavuze ko “Guverinoma y’u Burundi ishaka guhisha ingorane yagize mu kongera gukurikirana dosiye z’ingirakamaro. Uko mbibona, ni ugushaka kuyobya politiki.”

Buyoya yavuze ko ari impmvu zo gushaka gushyigikirwa n’abahutu mu matora ya Perezida iki gihugu cyitegura kwinjiramo mu 2020, babumvisha ko Perezida wabaye uwa mbere ubakomokamo yishwe.

Ati “Ingufu bashaka gukoresha aha nk’intwaro, ni ugufungura ikirego ku muntu utavuga rumwe cyangwa ubabona nk’abadashoboye.”

Iki kinyamakuru kimubajije niba ibyo avuze bishatse kuvuga ko ari umwe mu batavuga rumwe na guverinoma ya Nkurunziza yasubije ati “Nta gahunda ya Politiki mfite mu Burundi ariko mfatwa nk’umwanzi nimero ya mbere kubera ko ndi umututsi kandi numvwa n’imiryango mpuzamahanga ndi inyuma y’igihugu.”

Buyoya avuga ko ubwo Ndadaye yicwaga atari Perezida w’u Burundi ndetse nta mirimo yari afite mu gisirikare cyangwa ubutegetsi bw’icyo gihe.

Ati “Biragoye gutekereza ko nari gukora ikintu cyababaza Perezida Ndadaye.”

Yavuze ko iyo aza kuba umuntu utavuga rumwe n’ubutegetsi nk’uko guverinoma y’u Burundi imufata, yari gukora mu buryo ubwo aribwo bwose wenda akaba yabangamira amatora icyo gihe ariko atariko byageze kuko yahererekanyije ubutegetsi binyuze muri Demokarasi.

Gufungura dosiye ya Ndadaye, Buyoya abibona nk’intwaro Guverinoma ya Nkurunziza ishaka kwitwaza ku kurenga ku bikubiye mu masezerano y’amahoro ya Arusha no kubiba politiki y’amacamubiri mu gihugu, ishingiye ku gushaka gukandamiza ubwoko bw’abatutsi.

Avuga ko Nkurunziza yashishikarije abakuru b’ibihugu gushyigikira Buyoya mu 2014 ubwo yiyamarizaga kuyobora mu Muryango uhuza ibihugu bivuga igifaransa, bigoye kumva ukuntu uyu munsi amurwanya, akamufata nk’umunyabyaha.

Buyoya avuga ko umubano we na Nkurunziza wari nta makemwa, watangiye kuzamo agatotsi mu 2015 ubwo yiyamamarizaga manda ya gatatu atemererwaga n’amategeko.

Buyoya yagiye ku butegetsi muri 1987, abifashijwemo n’igisirikare. Yavuye kuri uyu mwanya binyuze mu matora aho yatsinzwe na Ndadaye muri 1993.

Ndadaye yaje kwicwa ku wa 21 Ukwakira 1993, aho bivugwa ko yishwe n’igisirikare cyo ku ruhande rwa Buyoya.

Buyoya wabaye Perezida w’u Burundi yahishuye impamvu afatwa nk’umwanzi w’ubutegetsi bwa Nkurunziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza