Buyoya wayoboye u Burundi inshuro ebyiri akoze coups d’état, asize nkuru ki musozi ?

Yanditswe na Iradukunda Serge
Kuya 18 Ukuboza 2020 saa 11:38
Yasuwe :
0 0

Hashize amasaha make umuryango w’uwahoze ari Perezida w’u Burundi Pierre Buyoya utangaje ko yitabye Imana, ni umugabo ugiye afitanye ibibazo na Leta y’u Burundi kuko yari yaramushyiriyeho impapuro zo ku muta muri yombi ndetse urukiko rwo muri iki gihugu rwaramukatiye igifungo cya Burundu nyuma yo kumuhamya uruhare mu rupfu rwa Melchior Ndadaya nawe wayoboye iki gihugu.

Pierre Buyoya wayoboye u Burundi inshuro ebyiri mu bihe bitandukanye yapfuye kuri uyu wa Gatanu afite imyaka 71.

Icyamuhitanye ntikiramenyekana ariko Ijwi rya Amerika ryatangaje urupfu rwe bwa mbere , ryavuze ko hakekwa ko yaba yazize icyorezo cya Coronavirus.

Umwe mu bo mu muryango wa Buyoya, yabwiye Ikinyamakuru Iwacu ko yapfuye ubwo yari mu nzira ajyanywe kuvurirwa mu Bufaransa.

Major Pierre Buyoya yayoboye u Burundi inshuro ebyiri (1987-1993, 1996-2003). Uyu mugabo aza ku mwanya wa kabiri mu bakuru b’igihugu bayoboye u Burundi imyaka myinshi (13).

Buyoya wapfuye yabonye izuba ku wa 24 Ugushyingo mu 1949 avukira i Rutovu mu Ntara ya Bururi.

Uretse kumenyekana muri Politike y’u Burundi uyu mugabo yanabaye mu gisirikare cy’iki gihugu aho yari afite ipeti rya Majoro. Ni nyuma yo kurangiza amasomo mu mashuri ya gisirikare atandukanye arimo Royal Military Academy ryo mu Bubiligi, yanize kandi mu Bufaransa no mu Budage.

Yagize Uruhare muri Coups d’Etat zabaye mu Burundi

Ku wa 3 Nzeri mu 1987, Pierre Buyoya wari ufite ipeti rya Major yayoboye Coup d’état yahiritse ubutegetsi bwa Jean- Baptiste Bagaza, maze aba Perezida wa mbere wayoboye iki gihugu muri Repubulika ya gatatu.

Buyoya yahengereye ubwo Bagaza yari mu ruzinduko rw’akazi muri Canada, ahita atangaza ko afashe ubutegetsi. Kuba yari azwi nk’inararibonye mu gisirikare, byakiriwe bityo.

Agifata ubutegetsi yahise aca iteka, ategeka ko Perezida Bagaza atemerewe na gato kongera gukandagira ukundi ku butaka bw’u Burundi.

Afata ubutegetsi yasezeranyije abaturage ko azashyiraho guverinoma itagendera ku moko, Abahutu n’Abatutsi bose bagasangira ubutegetsi, gusa ibi si ko byaje kugenda kuko ubutegetsi bwe bwihariwe cyane n’abo mu bwoko bw’Abatutsi ndetse abaturage batangira ku mushinja kubayoboresha igitugu.

Ibi byatumye abo mu bwoko bw’Abahutu batangira kwigomeka ku butegetsi bwe ndetse muri Kanama 1988 baha ubwicanyi bwaguyemo abagera ku bihumbi 20.

Ubu bwicanyi bwatumye Buyoya ashyiraho komisiyo ayiha inshingano zo gushakira umuti aya makimbirane ndetse no gushaka ubwumvikane hagati y’amoko yombi. Iyi komisiyo yaje gushyiraho Itegeko Nshinga rishya maze nawe mu 1992 araryemeza.

Iri tegeko Nshinga ryagenaga ko hajyaho guverinoma idashingiye ku moko hagatorwa Perezida n’abagize Inteko Ishinga Amategeko. Muri Kamena 1993 habaye amatora anyuze muri Demokarasi maze Abarundi batora Melchior Ndadaye uva mu bwoko bw’Abahutu ngo abe ariwe ubayobora.

Muri aya matora Ndadaye yatorewe kuba Perezida atsinze Buyoya wari umaze imyaka itandatu ku butegetsi.

Ndadaye akigera ku butegetsi, inshuro nyinshi yashatse guhirikwa n’abasirikare bari bagizwe ahanini n’abo mu bwoko bw’abatutsi.

Uwo mugabo kandi yari yugarijwe impande zose kuko uretse abatutsi by’umwihariko abasirikare batamwibonagamo n’abahutu bari bamumereye nabi ngo ashyikirize inkiko abatutsi bagize uruhare mu bwicanyi bwagiye buba muri icyo gihugu bugahitana imbaga y’abahutu.

Ubutegetsi bw’uyu mugabo ntibwateye kabiri kuko mu Ukwakira 1993 Igisirikare cy’u Burundi cyaramwishe, maze igihugu gisubira mu ntambara yaguyemo abasaga ibihumbi 150.

Jean Baptiste Bagaza yahiritswe ku butegetsi na Buyoya

Uko Ndadaye yishwe, Buyoya akaryozwa urupfu rwe

Saa munani z’ijoro ku wa Kane tariki 21 Ukwakira 1993, mu Mujyi wa Bujumbura amasasu yavugiye hafi y’Ingoro y’Umukuru w’Igihugu, iruhande rwa Hotel Source du Nil yari yarayemo umunyamakuru wa Jeune Afrique, Laurent Giraudineau.

Amaze kumva amasasu, yarombotse akura amarido ku madirishya, arebye hasi abona abasirikare bari kurasa bashaka kwinjira mu biro by’Umukuru w’Igihugu, Melchior Ndadaye, wari umaze iminsi ijana atowe n’abaturage.

Urusaku rw’amasasu rwamaze iminota 45. Ibisasu byarashwe byasenye igice kimwe cy’ibiro bya Perezida ndetse no kuri hotel Source du Nil.

Saa mbili za mu gitondo, imodoka ya gisirikare yaje kuri Perezidansi itwaye Ndadaye n’umuryango we, abashinzwe kumurinda bamusezeranya kwita ku mutekano we.

Umwe mu bakozi ba Perezidansi yabonye ibintu atari ibisanzwe, ashaka gutorokesha Ndadaye ariko undi arabyanga.

Imodoka y’abamurinda yahise imujyana mu kigo cya Muha, agezeyo asanga abasirikare barakaye bamutegereje ari nabo bari baraye barasa bamushaka ngo bamukure ku butegetsi.

Abo basirikare basabye abamurinda kumubaha, abamurinda babanza kubyanga bajya mu biganiro byarangiye bemeye kumutanga ahagana saa tatu za mu gitondo.

Ba basirikare bari bateguye Coup d’état, bishe Ndadaye ahagana saa yine bamwicira muri icyo kigo bamuhondaguye ibyuma byamuvunnye imbavu, banamunigisha ikiziriko nkuko byagaragajwe na raporo y’isuzumamurambo yakozwe nyuma y’iminsi apfuye.

Umurambo wa Ndadaye waje kuboneka nyuma y’iminsi mike ushyinguye mu irimbi rya Ruziba mu Majyepfo ya Bujumbura. Wataburuwe tariki 30 Ukwakira ujyanwa mu ruganda rwenga inzoga rwa Brarudi.

Umunsi Ndadaye yishweho, abasirikare bahise birara mu bayobozi bo mu ishyaka Sahwanya Frodebu Ndadaye yaturukagamo barabica, by’umwihariko Perezida w’Inteko Ishinga Amategeko, Pontien Karibwami na Visi Perezida we Gilles Bimazubute ari nabo Itegeko Nshinga ryagenaga ko bashobora kumusimbura.

Nyuma y’urupfu rwa Ndadaye, u Burundi bwayobowe na Cyprien Ntaryamira utaramaze kabiri kuko yaguye mu ndege yanahitanye uwari Perezida w’u Rwanda, Juvénal Habyarimana, nyuma y’urupfu rwe yahise asimburwa na Sylvestre Ntibantunganya.

Mu 1996 Buyoya yaje kongera gukora Coup d’état abifashijwemo n’abasirikare bari bamushyigikiye cyane maze ahirika ku butegetsi Sylvestre Ntibantunganya.

Urukiko rw’Ikirenga rw’u Burundi mu 1999 rwahamije abasirikare batanu uruhare mu rupfu rwa Ndadaye, rubakatira urwo gupfa.

Mu bakatiwe icyo gihe harimo Paul Kamana wari warahungiye muri Uganda ari na we wayoboye abasirikare bateye kuri Perezidansi ya Ndadaye, Laurence Nzeyimana, Juvénal Gahungu, Sylvère Nduwumukama na Emmanuel Ndayizeye.

Hari abandi 38 bagizwe abere barimi Col Jean Bikomagu wari Minisitiri w’Ingabo akaba n’Umugaba Mukuru wazo ubwo Ndadaye yicwaga.

Uretse aba na Buyoya yashinjwe kugira uruhare mu rupfu rwa Ndadaye ahanini bishingiye ku kuba mu 1993 hari abanyepolitiki bo muri Uprona biyamamaje babwira abaturage ko niba bashaka kongera kuba impunzi, imfubyi cyangwa abapfakazi bazatora undi utari Buyoya.

Ibyo kandi bishingirwa ku kuba nyuma y’urupfu rwa Ndadaye, Buyoya atarahise ajya ku mugaragaro ngo abyamagane nk’uwahoze ari Perezida no kuba abahise batangaza ko bafashe ubutegetsi bari bagizwe n’abahoze ari ibyegera bye.

Abashinja Buyoya kugira uruhare mu rupfu rwa Ndadaye babishingira kandi ku kuba abakoze Coup d’état bagororewe imyanya myiza ubwo Buyoya yasubiraga ku butegetsi mu 1996.

Ibi byatumye mu 2018 Leta y’u Burundi Leta y’u Burundi isohora impapuro zo guta muri yombi Pierre Buyoya wahoze ayoboye icyo gihugu we n’abandi 11 bashinjwa kuba ku isonga y’urupfu rwa Ndadaye.

Mu Ukwira 2020 Urukiko rw’Ikirenga mu Burundi rwaje gukatira Pierre Buyoya igifungo cya Burundu nyuma yo kumuhamya uruhare mu iyicwa rya Melchior Ndadaye. Gusa Buyoya we iki cyaha ntiyigeze acyemera na rimwe.

Pierre Buyoya yayoboye u Burundi ubugira kabiri nyuma yo gukora Coups d’état ebyiri
Yashinjwe uruhare mu rupfu rwa Melchior Ndadaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .