Buyoya wayoboye u Burundi agiye kujuririra igifungo cya burundu yakatiwe

Yanditswe na IGIHE
Kuya 22 Ukwakira 2020 saa 01:26
Yasuwe :
0 0

Pierre Buyoya wayoboye u Burundi, yatangaje ko agiye kujurira icyemezo giherutse gufatwa n’urukiko rw’Ikirenga mu mujyi wa Bujumbura, cyo kumukatira igifungo cya burundu nyuma yo kumuhamya uruhare mu rupfu rwa Melchior Ndadaye wahoze ari Perezida.

Urukiko rw’Ikirenga mu Burundi rushinja Buyoya na bagenzi be ibyaha birimo gutera umukuru w’igihugu no kugaba igitero kigambiriye ubwicanyi.

Major Pierre Buyoya yayoboye u Burundi inshuro ebyiri (1987-1993, 1996-2003). Uyu mugabo w’imyaka 70, aza ku mwanya wa kabiri mu bakuru b’igihugu bayoboye u Burundi imyaka myinshi (13).

Yasimbuwe ku butegetsi na Ndadaye watorewe kuyobora u Burundi muri Kamena 1993; yegukanye intsinzi y’amajwi 65% mu gihe Buyoya yagize amajwi 32%. Yaje kwicwa mu Ukwakira 1993 nyuma y’iminsi 102 atangiye kuyobora igihugu.

Mu nyandiko yasohoye kuri uyu wa Gatatu, Buyoya yavuze ko batemera ibihano bafatiwe kuko urubanza rwabaye ku nyungu za politiki kandi rukaba binyuranyije n’amategeko.

Yavuze ko urubanza rwatangiye rugamije kuyobya amahanga ku mvururu zakuruwe na manda ya gatatu ihabanye n’Itegeko Nshinga ya Perezida Pierre Nkurunziza hagamijwe ubukangurambaga bushingiye ku moko buganisha ku matora yabaye mu 2020.

Yavuze ko kandi kuba rwarasomwe mu gihe hibukwa imyaka 27 Ndadaye yishwe, nabyo ngo ni ibyo kwibazwaho kuko bigamije kunezeza imitima y’abantu gusa.
Buyoya yavuze ko urwo rubanza kandi ruhabanye n’amasezerano ya Arusha yo mu 2000 yari agamije amahoro n’ubwiyunge mu Burundi.

Yavuze ko abunganira abaregwa basabye kenshi guhabwa dosiye zikubiyemo ibimenyetso bashingiyeho babakatira, ariko ntabwo bayihawe.

Buyoya kandi avuga ko urwo rubanza rwakozwe mu buryo bunyuranyije n’amategeko y’u Burundi na mpuzamahanga, kuko rwirengagije ko hari urundi rubanza rwari rwaraciwe mbere kuri icyo kibazo.

Avuga kandi ko urwo rubanza rwarenze ku mategeko kuko ibyabaye hashize imyaka isaga 20 bibaye, mu gihe ubwo ngo icyaha cyakorwa itegeko ryavugaga ko iyo kirengeje imyaka kitaraburanishwa gisaza.

Ati “Twamaganye imyanzuro y’urwo rubanza tutagizemo uruhare. Tuzajuririra izindi nzego z’igihugu na mpuzamahanga kugira ngo ubutabera butangwe ku barenganyijwe.”

Mu ijoro ryo ku wa 21 Ukwakira 1993 nibwo Umutwe w’Abasirikare b’u Burundi wafashe umukuru w’igihugu, Melchior Ndadaye, wa mbere wari ugiyeho biciye mu matora ya demokarasi, uramwica.

Iyicwa rye ryakurikiwe n’ubwicanyi bwo kwihorera hagati y’Abahutu n’Abatutsi, ndetse Abarundi bagera mu bihumbi 300 barishwe abandi barahunga.

Mu 1998 hari abasirikare baciriwe imanza, ariko abatari bake babitera utwatsi. Ubwo yaganiraga n’abanyamakuru mu 2003 hitegurwa kwibuka imyaka 10 Ndadaye yishwe, Jean Minani wari uyoboye ishyaka FRODEBU, yavuze ko abasirikare bato ari bo bafashwe n’ubucamanza bagafungwa.

Yavuze ko bitumvikana uko bashobora kuba barateguye bakanashyira mu bikorwa umugambi wo kwica Melchior Ndadaye.

Buyoya yavuze ko urubanza rwe rwaciwe ku nyungu za politiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .