Burundi: Visi Perezida na Minisitiri w’Intebe barahiye (Amafoto)

Yanditswe na Bukuru JC
Kuya 24 Kamena 2020 saa 05:37
Yasuwe :
0 0

Alain Guillaume Bunyoni yarahiye nka Minisitiri w’Intebe w’u Burundi naho Prosper Bazombanza nka Visi Perezida w’u Burundi, imyanya bashyizwemo bijyanye n’itegeko nshinga rishya ryemejwe mu 2018.

Ni igikorwa cyabereye mu murwa mukuru Bujumbura, kiyoborwa na Perezida Evariste Ndayishimiye. Aba bayobozi bombi barahiriye imbere y’Inteko Ishinga amategeko, imitwe yombi, bemejwe mu Nteko rusange y’Inteko Ishinga Amategeko yateranye kuri uyu wa Kabiri, tariki ya 23 Kamena 2020.

Gen. Alain Guillaume Bunyoni yemejwe nka Minisitiri w’Intebe mu Burundi, ku majwi 92 kuri 94 mu gihe Prosper Bazombanza yatowe ku majwi 91 kuri 94, babiri ntibamutoye mu gihe umwe yifashe.

Iryo tora ariko ryakozwe abadepite b’ishyaka ritavuga rumwe n’ubutegetsi, CNL, riyobowe na Agathon Rwasa badahari, bavuga ko batakimenyeshejwe.

Bunyoni wagizwe Minisitiri w’Intebe yari asanzwe ari Minisitiri w’Umutekano mu Burundi. Bunyoni ni we ufite n’ipeti rya mbere riruta ayandi yose mu gipolisi, "Commissaire de Police General”. Yabaye minisitiri w’umutekano kuva mu 2005 kugeza mu 2011, umwanya yongeye gusubiraho kuva mu 2015 kugeza ubu.

Prosper Bazombanza yigeze kuba visi perezida ku bwa Pierre Nkurunziza uheruka kwitaba Imana, umwanya yagiyeho hagati ya 2014-2015, aho aturuka mu ishyaka UPRONA, igice kiri muri Leta.

Perezida Ndayishimiye afite inshingano zo gushinga Guverinoma igomba kurahirira imbere y’Urukiko rushinzwe kurengera Itegeko Nshinga n’Inteko Ishinga Amategeko, Umutwe w’Abadepite n’uwa Sena.

Bunyoni wagizwe Minisitiri w’Intebe ariko ari ku rutonde rw’abantu barindwi barimo abakuru mu gisirikare n’igipolisi, bafatiwe ibihano n’Umuryango w’Ubumwe bw’u Burayi na Leta Zunze Ubumwe za Amerika. Muri ibyo bihano harimo ko batemerewe gukandagira muri ibyo bihugu ndetse imitungo yabo yagaragara muri ibyo bihugu igomba gufatirwa.

Ni ibyemezo byafashwe nyuma y’imvururu zakurikiye amatora y’umukuru w’igihugu mu 2005, yegukanwe na Pierre Nkurunziza uheruka kwitaba Imana.

Ni umuhango witabiriwe n'abayobozi batandukanye
Abahagarariye ibihugu byabo n'imiryango mpuzamahanga mu Burundi bari batumiwe
Bazombanza na Bunyoni bari babukereye
Dr Joseph Butore wari Visi Perezida wa Kabiri na Gaston Sindimwo (hagati) wari Visi Perezida wa Mbere bari batumiwe
Alain Guillaume Bunyoni arahirira kuba Minisitiri w'Intebe w'u Burundi
Bunyoni arahirira inshingano ze
Bazombanza yarahiye nka Visi Perezida w'u Burundi
Bazombanza asinyira inshingano ze
Perezida Evariste Ndayishimiye yakiriye indahiro z'aba bayobozi

Amafoto: RTNB


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .