Burundi: Umugore wa Perezida Nkurunziza yagiye kuvurirwa muri Kenya nyuma yo kwandura Coronavirus

Yanditswe na Bukuru JC
Kuya 29 Gicurasi 2020 saa 10:41
Yasuwe :
0 0

Umugore wa Perezida w’u Burundi, Denise Bucumi Nkurunziza, yashyizwe mu bitaro bya Aga Khan biri i Nairobi muri Kenya, aho bivugwa ko yanduye Coronavirus.

Amakuru avuga ko umugore wa Pierre Nkurunziza yajyanywe muri Kenya kuri uyu wa Kane mu gitondo akuwe i Bujumbura, akaba yaratwawe n’indege y’Umuryango Nyafurika utanga ubufasha mu buvuzi (AMREF).

Ikinyamakuru The Citizen cyanditse ko kugeza ubu uko Denise Bucumi Nkurunziza amerewe bitaramenyekana. Umugabo we Nkurunziza, ntabwo yari muri iyo ndege yamujyanye i Nairobi, ahubwo yaherekejwe n’abarinzi batatu barimo umwe na we wasanzwemo Coronavirus.

Kugeza ubu ntiharamenyekana uko yemerewe kwinjira muri Kenya kuko iki gihugu cyashyizeho amabwiriza y’uko abinjira ari abataranduye Coronavirus.

U Burundi ni kimwe mu bihugu byagaragaje imbaraga nke mu guhangana n’icyorezo cya Coronavirus cyugarije Isi, aho ibikorwa byakomeje nk’ibisanzwe ndetse hagakorwa n’amatora yasize Gen Evariste Ndayishimiye atorewe kuyobora igihugu.

Mu ntangiriro z’uko kwezi u Burundi bwategetse ko abahagarariye OMS, ndetse n’impuguke eshatu zahuzaga ibikorwa byo kurwanya Coronavirus bava mu gihugu.

U Burundi kandi nicyo gihugu cyonyine muri Afurika kitigeze gihagarika imikino y’umupira w’amaguru muri iki gihe cya Coronavirus.

Denise Bucumi Nkurunziza yagiye kuvurirwa Coronavirus muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .