00:00:00 IGIHE NETWORK KN KINYARWANDA EN ENGLISH FR FRANCAIS

Burundi: Leta yatunzwe agatoki ko ifite umugambi wo kwigarurira ’Kira Hospital’

Yanditswe na IGIHE
Kuya 25 April 2022 saa 08:40
Yasuwe :

Abunganizi ba Dr Christophe Sahabo, Umuyobozi Mukuru w’Ibitaro byigenga mu Burundi, Kira Hospital, baramutabariza nyuma y’ibyumweru bitatu atawe muri yombi.

Dr Christophe Sahabo, uyobora Kira Hospital, ibitaro by’Abasuwisi, yafunzwe mu ntangiriro za Mata nk’uko inkuru ya Rfi yabitangaje nubwo nta muyobozi mu butegetsi bw’u Burundi uragira icyo abivugaho.

Amakuru ava mu nzego z’ubutasi avuga ko yafunzwe ku mpamvu zifitanye isano n’inyerezwa ry’umutungo mu gihe ku rundi ruhande bivugwa ko byaturutse ku bushake bw’ubutegetsi bushaka kwigarurira ibyo bitaro aho imigabane myinshi ari iy’abikorera.

Abunganira uregwa bamagana ibikorwa byinshi binyuranyije n’amategeko byakozwe kuva umukiliya wabo yatabwa muri yombi birimo kutubahiriza itegeko rigena ko umuntu ukekwaho icyaha afungishwa ijisho iminsi irindwi yongerwa inshuro imwe kandi akaba ari kumwe n’umwunganizi mu gihe cy’ibazwa.

Muri ibyo byose nta cyubahirijwe n’inzego zishinzwe iperereza nk’uko bakomeza bavuga, bakongeraho ko yafashwe ari nijoro ndetse abamutwaye bakaba nta cyangombwa cyemeza ifatwa rye bari bitwaje.

Abavoka ba Dr Christophe Sahabo, Me Emmanuel Hakizimana na Ernest Ndikumukama bavuze ko umukiliya wabo kugeza ubu afungiwe ahantu h’ibanga ku buryo abo mu muryango we ndetse n’abamwunganira batarabasha kumuca iryera kuva afunzwe mu minsi 22 ishize.

Ikibabaje nk’uko bakomeza babivuga ntabasha gufata imiti ikwiye mu gihe afite ibibazo bikomeye by’indwara ya asthma. Inkuru ya Rfi ikomeza ivuga ko kugeza ubu ibitaro ‘Kira Hospital’ biri mu maboko ya leta.

Dr. Christophe Sahabo yahatiwe kwegura ku munsi yatawe muri yombi. Umuyobozi w’Inama y’Ubutegetsi ukomoka mu Bufaransa, Dr Jean David Pillot watawe muri yombi ku munsi umwe na Dr Sahabo yarekuwe bucyeye.

Ariko ntiyemerewe kuva ku butaka bw’u Burundi keretse ubwo yemeraga kwegura ku gahato nyuma yo kurekurwa. Guhera ubwo hashyizweho inama y’ubutegetsi nshya igizwe n’abantu ba hafi mu butegetsi bw’u Burundi hatitaweho ko abikorera ari bo bafitemo imigabane myinshi.

Ibitaro byigenga mu Burundi 'Kira Hospital' byaba bigiye kujya mu maboko ya leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .