00:00:00 IGIHE NETWORK KN KINYARWANDA EN ENGLISH FR FRANCAIS

Burundi: Komisiyo CVR igiye gucukumbura iby’ubwicanyi bwitiriwe ’Ntega na Marangara’

Yanditswe na IGIHE
Kuya 27 January 2022 saa 02:58
Yasuwe :

Komisiyo ishinzwe gucukumbura ukuri no kubanisha neza Abarundi (CVR: Commission Vérité et Réconciliation) yatangaje ko igiye gutangira gucukumbura ibyabaye mu bwicanyi bwitwa ubwa ‘Ntega na Marangara’ mu 1988.

CVR ni Komisiyo yemejwe n’amasezerano ya Arusha yo guhagarika intambara mu Burundi mu 2000. Ishinzwe gukora isesengura ku bibazo n’intambara byagiye bigwirira u Burundi mu bihe bitandukanye.

Iyi komisiyo imaze gukora icukumbura ku bwicanyi bwo mu 1972 ryarangiye ifashe umwanzuro ko ari Jenoside yakorewe Abahutu.

Kuri ubu ikigezweho ni ubwicanyi bwabereye muri Komini Ntega yo mu Ntara ya Kirundo na Marangara yo mu Ntara ya Ngozi mu 1988 mu Burasirazuba bw’igihugu ku butegetsi bwa nyakwigendera Pierre Buyoya.

Abantu bagera ku bihumbi 15 ni bo bahasize ubuzima nk’uko byatangajwe mu cyegeranyo cya Loni mu 2000, benshi bakaba ari abo mu bwoko bw’Abahutu.

Umuyobozi wa CVR, Pierre Claver Ndayicariye, yatangaje kuri uyu wa Gatatu ko ukuri kuri ubwo bwicanyi kugomba kujya ahagaragara byanze bikunze.

Yavuze ko muri uyu mwaka hazashakishwa urutonde rw’abantu bose bishwe mu Burundi ku ngoma zitandukanye zategetse iki gihugu.

Nubwo bimeze bityo, bamwe mu babuze ababo by’umwihariko abishwe mu 1993 bavuga ko bibagiranye nubwo CVR ivuga ko ubwo bwicanyi na bwo izabukoraho. Abo ni abo mu bwoko bw’Abatutsi bashinja CVR kubogamira ku bwoko bumwe.

Umwe mu barokokeye mu Ntara ya Muyinga mu 1993 yabwiye VOA dukesha iyi nkuru ko CVR ikora nka komisiyo ya politiki kuruta uko yunga Abarundi cyangwa ikagaragaza ukuri ku byabaye, ibyo yavuze ko bishobora gukurura ibindi bibazo mu gihugu mu bihe bizaza.

Ndayicariye yasabye abagize uruhare bwicanyi bwabaye mu Burundi mu bihe bitandukanye gusaba imbabazi.

Ati “Gusezera iyi Si warishe inzirakarengane udasabye imbabazi uba uraze umuryango izina n’ibikorwa bibi kandi batagutumye kubikora. CVR yongeye guhamagarira abakiriho ngo batere iyo ntambwe yo kwibohora.”

Hari abifuza ko mu Burundi hajyaho Urukiko rwigenga kuko ari rwo rwaba igisubizo ku bibazo byabayeho nyuma y’intambara zitandukanye.

Umuyobozi wa CVR, Pierre Claver Ndayicariye yatangaje ko ukuri ku bwicanyi bwitiriwe Ntega na Marangara kugomba kujya ahagararara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .