Burundi: Hamaze kuboneka imibiri isaga ibihumbi bitandatu yakuwe mu byobo rusange

Yanditswe na IGIHE
Kuya 16 Gashyantare 2020 saa 09:36
Yasuwe :
0 0

Komisiyo ishinzwe gucukumbura ukuri n’ubwiyunge mu Burundi imaze kubona imibiri isaga ibihumbi bitandatu yagiye ijugunywa mu byobo mu ntara ya Karusi, mu rugendo rwo kumenya ahagiye hashyingurwa abantu bishwe mu mvururu zose zibasiye u Burundi mu myaka ishize.

Muri Karusi niho hamaze kuboneka imibiri myinsi guhera muri Mutarama ubwo Leta yatangizaga gahunda yo gushakisha imibiri.

Umuyobozi w’iyo Komisiyo, Pierre Claver Ndayicariye kuri uyu wa Gatanu yabwiye abanyamakuru ko hamaze kuboneka imibiri 6,032 n’ibihumbi by’amasasu.

Bamwe bagiye bamenya ababo bishwe bagendeye ku myenda, amadarubindi n’amashapule babaga bambaye.

U Burundi buri mu rugamba rwo gucukumbura ibyagiye biba mu myaka yashize, aho yaranzwe n’ubugizi bwa nabi hagati y’amoko atuye icyo gihugu cyane cyane Abatutsi n’Abahutu, uko ubutegetsi bwagendaga busimburabana.

Intambara yayogoje u Burundi yarangiye mu 2005 imaze guhitana abarenga 300 000.

Mu 1972 habayeho ubwicanyi bwibasiye cyane Abahutu, aho bivugwa ko abagera ku 150 000 bishwe.

Komisiyo yashyizweho na Leta mu 2014 ngo ikore icukumbura ku bwicanyi bwagiye buba mu Burundi guhera mu 1885 ubwo abakolini bazaga muri icyo gihugu kugeza mu 2008 ubwo hasinywaga amasezerano ya burundu yo kugarura amahoro.

Iyo Komisiyo imaze gutahura ibyobo bisaga 4000 hirya no hino mu gihugu byajugunywemo abantu, mu gihe hamaze kuboneka abantu 142 000 baguye mu bugizi bwa nabi bwagiye buba mu Burundi.

Mu nshingano z’iyo Komisiyo hazakorwa iperereza ku gice kimwe cy’ubutegetsi bwa Perezida Pierre Nkurunziza wagiye ku butegetsi mu 2005, kuko igomba gukora ku byabaye kugeza mu 2008.

Mu Burundi hakomeje kuboneka ibyobo byagiye bijugunywamo abaturage bishwe mu mvururu zaranze icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .