Burundi: Amerika ihangayikishijwe n’itegeko risaba abigometse gutanga intwaro

Yanditswe na

Cyprien Niyomwungeri

Kuya 6 Ugushyingo 2015 saa 12:10
Yasuwe :
0 0

Ambasaderi wa Leta Zunze Ubumwe z’Amerika muri Loni, Samantha Power yatangaje ko igihugu cye gitewe impungenge n’ibizakurikira nyirantarengwa yo gusubiza intwaro ku bushake, yatanzwe na Perezida Nkurunziza wavuze ko nyuma y’aho abazazifatanwa bazafatwa nk’abanzi b’igihugu.

The East African yatangaje ko ejo kuwa Kane tariki 5 Ugushyingo ari bwo Ambasaderi Power yagaragaje impungenge zirimo ihohoterwa rishobora gukorerwa abaturage, nyuma y’uko iyo nyirantarengwa izaba irangiye mu mpera z’iki cyumweru.

Ambasaderi Power yavuze ko Leta Zunze Ubumwe z’Amerika zitewe impungenge n’ukwiyongera kw’ihohoterwa rikorerwa abaturage mu Burundi, amagambo mabi akoreshwa n’abari muri Guverinoma, abarwanyi, ndetse n’ihohoterwa rikorwa n’abarwanya ubutegetsi n’abandi banyabyaha.

Yagize ati “Leta Zunze Ubumwe z’Amerika zitangaje ko zifite impungenge ko iminsi itanu ya nyirantarengwa yatanzwe na Perezida izatera imvururu guhera mu mpera z’iki cyumweru.”

Kuwa mbere w’iki cyumweru nibwo Perezida Nkurunziza yatanze umunsi ntarengwa w’itariki 7 Ugushyingo 2015, ngo Abarundi bafite intwaro bazitange ku bushake, kuko abatazabikora bazafatwa nk’abanzi b’igihugu.

Ambasaderi Power avuga ko batewe impungenge bikomeye n’uko itariki yatanzwe na Nkurunziza nirangira hazakoreshwa ingufu z’abashinzwe umutekano, bagahohotera abaturage mu gihe cyo gusaka intwaro mu ngo z’abatazazitanga ku bushake.

Yakomeje asaba Guverinoma y’u Burundi kwemerera byihuse abagenzuzi b’akanama k’uburenganzira bwa muntu n’umutekano mu muryango w’Afurika Yunze Ubumwe, bakagira uruhare mu biganiro byo guhuza impande zishyamiranye.

Samantha Power, Ambasaderi wa Leta Zunze Ubumwe z’Amerika muri Loni

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza