Burundi: Agathon Rwasa yemejwe nk’umukandida mu matora ya Perezida

Yanditswe na IGIHE
Kuya 17 Gashyantare 2020 saa 08:46
Yasuwe :
0 0

Ishyaka ritavuga rumwe n’ubutegetsi mu Burundi, Congrès Nationale pour la Liberté (CNL), kuri iki Cyumweru ryemeje Agathon Rwasa, nk’umukandida uzarihagararira mu matora ya Perezida wa Repubulika ateganyijwe kuwa 20 Gicurasi 2020.

Kandidatire ya Agathon Rwasa, yatoranyijwe na biro nyobozi ya CNL. Uyu mugabo w’imyaka 56, afatwa nk’impirimbanyi mu batavuga rumwe n’ubutegetsi, bikaba byitezwe ko ari we uzahangana cyane na Gen Evariste Ndayishimiye, watanzwe n’ishyaka riri ku butegetsi CNDD-FDD.

Mu matora ya 2010 n’aya 2015 nabwo Rwasa, yari umwe mu bakandida batavuga rumwe n’ubutegetsi bakomeye ariko aya matora yombi yagiye ayikuramo.

Ubwo yari amaze kwemezwa nk’uzahagararira CNL, Rwasa yamaganye ibivugwa ko hari abashaka kuzavangira imigendekere myiza y’amatora.

Ati “Mu gihe twegereza amatora, biratangaje kumva ko hari abantu batekereza kwiba amatora. Abarundi ntabwo bazemera ko babikora”.

Ishyaka CNL ni rishya mu Burundi kuko ryemewe n’amategeko muri Gashyantare 2019, nyuma y’uko umuyobozi waryo Agathon Rwasa yirukanywe mu rindi rya FNL yahozemo.

Iri shyaka kandi ryashinzwe kugira ngo hajyanishwe n’ibiteganywa mu Itegeko Nshinga rishya rya 2018, ribuza ukwihuza kw’amashyaka atavuga rumwe n’ubutegetsi.

Umuryango w’Abibumbye uherutse gutanga umuburo w’uko ibikorwa byo guhohotera abaturage bishobora kwiyongera mbere y’amatora.

Agathon Rwasa yemejwe nk'umukandida mu matora ya Perezida w'u Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza