Burundi: Abatavuga rumwe na Leta bahunze bahamagariwe kugira uruhare mu matora ya Perezida

Yanditswe na Ferdinand Maniraguha
Kuya 18 Kanama 2019 saa 08:43
Yasuwe :
0 0

Guverinoma y’u Burundi yahagamagiye abatavuga rumwe na Leta bahunze kugaruka mu gihugu bakagira uruhare mu matora rusange azaba mu mwaka utaha wa 2020.

Uyu mwanzuro wafashwe na Guverinoma ya Perezida Pierre Nkurunziza n’ishyaka CNDD FDD riri ku butegetsi hagamijwe gushakisha ituze mu gihe hitegurwa amatora arimo aya Perezida umwaka utaha.

Leta ya Nkurunziza yagiye ishinjwa kutihanganira abatavuga rumwe nayo, igashinjwa kubaheza no kubagirira nabi.

Visi Perezida w’u Burundi, Gaston Sindimwo yabwiye ikinyamakuru The EastAfrican ko amashyaka atavuga rumwe na Leta ari hanze ahawe ikaze mu matora ataha.

Yagize ati “Niba bashaka kuyobora, baramara iki hanze y’igihugu? Bakwiriye kuza bagakorera politiki mu gihugu.”

Amagambo ya Sindimwo aje nyuma y’itangazo ry’ihuriro ry’amashyaka atavuga rumwe na Leta y’u Burundi akorera mu buhungiro, CNARED, aherutse gutangaza ko yifuza kugaruka mu gihugu.

Iri huriro ryashinzwe mu mwaka wa 2015, rishingwa n’abatavuga rumwe na Leta bahunze igihugu nyuma y’imvururu zakurikiye amatora mu 2015.

Nubwo Guverinoma y’u Burundi ivuga ko abatavuga rumwe nayo bemerewe kugaruka mu gihugu, bamwe mu bagize CNARED n’abandi bagize sosiyete sivile bashyiriweho impapuro zo kubata muri yombi zitarakurwaho nyuma ya Coup d’Etat yapfubye mu 2015.

Sindimwo yavuze ko abafite ibyo baregwa, bazabanza kujya kubisobanura mu butabera.

Leta y’u Burundi ihamagariye abari hanze gutaha bakaza kwiyamamaza, mu gihe Perezida Nkurunziza yatangaje ko atazongera kwiyamamaza nubwo itegeko Nshinga bavuguruye ribimwemerera.

Perezida Nkurunziza yatangaje ko atazongera kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza