Bobi Wine yitabaje abanyamategeko mpuzamahanga mu rubanza rwe

Yanditswe na Rabbi Malo Umucunguzi
Kuya 22 Kanama 2018 saa 05:42
Yasuwe :
1 0

Depite Robert Kyagulanyi Ssentamu uzwi nka Bobi Wine, yitabaje ikigo cy’abanyamategeko cyo muri Leta Zunze Ubumwe za Amerika, mu rubanza aregwamo n’inzego za gisirikare muri Uganda.

Mu itangazo umwe mu bashinzwe ikigo Amsterdam & Partners LLP, Robert Amsterdam, yavuze ko ifatwa rya Bobi Wine ku wa 14 Kanama ryihishwe inyuma n’impamvu za politiki.

Yavuze ko Bobi Wine yakorewe “ibitari ibya kimuntu n’inzego z’umutekano ku buryo bishoboka ko atazanabikira.”

Yakomeje agira ati “Ibi bikorwa byo gutoteza bamwe bitaherukaga guhera ku butegetsi bwa Idi Amin bikwiye kwamaganwa n’Umuryango mpuzamahanga kugira ngo arekurwe ndetse n’abamukoreye iyicarubozo babiryozwe.”

Kuri uyu wa Gatatu nibwo Visi Perezida w’Inteko Ishinga Amategeko ya Uganda, Jacob L’Okori Oulanyah, yasuye Bobi Wine aho afungiye kuri gereza ya gisirikare ya Makindye, asura n’undi mudepite ufunzwe, Francis Zaake.

Yabwiye ati “Icyo niboneye ni uko bombi bafite uburibwe bwinshi. Ubwo nasuraga Depite Bobi Wine yabashije kuza yicarana nanjye ku meza, ifunguro rye rya mu gitondo bari barizanye, turaganira. Twasekaga, ariko afite ububabare bwinshi.”

Bobi Wine ashinjwa uruhare mu kumena ibirahuri by’imodoka ya Museveni.

Byiyongeraho ko uwo munsi umushoferi we yarashwe agapfa. Bobi avuga ko abamurashe bakekaga ko ari we bishe.

Izi mvururu zakurikiye ubwo Bobi Wine yamamazaga umukandida utavuga rumwe n’ubutegetsi, Kassiano Wadri, wahataniraga kwinjira mu Nteko Ishinga Amategeko ahagarariye agace ka Arua.

Yari ahanganye na Nusura Tiperu wo mu ishyaka NRM, ndetse Perezida Museveni yari yaje kumwamamaza.

Bose bahataniraga gusimbura depite Abiriga wo muri NRM uheruka kwicwa arashwe n‘abantu bataramenyekana, gusa uwo mwanya wegukanywe na Wadri ubu ari muri gereza.

Oulanyah yakomeje agira ati “Ibyabaye ntabwo byari bikwiye na gato. Birababaje kuba Abiriga yarishwe rubi none ibikorwa byo kumusimbuza mu Nteko Ishinga Amategeko biteye abaturage aka kababaro. Ntabwo byari bikwiye, ntabwo byari ngombwa. Ariko byarabaye.”

Ifungwa rya Bobi Wine ryateje imyigaragambyo ikomeye ndetse igisirikare cya leta gikoresha amasasu mu gutatanya abigaragambya, umuturage arapfa.

Kuri uyu wa Gatatu abanyeshuri bo muri kaminuza ya Kyambogo bafashe umwanzuro wo guhagarika amasomo kugeza igihe Museveni azarekurira Bobi Wine na bagenzi be.

Bobi Wine ari mu maboko y'inzego zishinzwe umutekano guhera ku wa 14 Kanama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .