Bobi Wine yakuriweho ibyaha n’Urukiko rwa Gisirikare, ajyanwa mu rwa Gisivile

Yanditswe na Ishimwe Israel
Kuya 23 Kanama 2018 saa 10:41
Yasuwe :
0 0

Depite Robert Kyagulanyi Ssentamu uzwi nka Bobi Wine, yakuriweho n’Urukiko rwa Gisirikare ibirego birimo ibyo gutunga intwaro binyuranye n’amategeko no guteza imyigaragambyo igamije guteza inabi mu baturage.

Urubanza rwa Depite Bobi Wine uhagarariye agace ka Kyadondo mu Nteko Ishinga Amategeko ya Uganda rwaburanishirijwe mu gace ka Gulu kuri uyu wa Kane, tariki ya 23 Kanama 2018.

Urukiko rwa Gisirikare rwamukuriyeho ibyaha byo gutunga intwaro binyuranye n’amategeko no guteza imyigaragambyo.

Icyaha cy’ubugambanyi akurikiranyweho, cyo azakiburanishwa n’inkiko zisanzwe za gisivile aho kuba iza gisirikare.

Nyuma yo gutangazwa ko Depite Bobi Wine ahanaguweho ibyaha n’Urukiko rwa Gisirikare, abantu benshi mu isoko Kisekka batangiye kugaragaza ibyishimo ariko ibyishimo byabo ntibyarambye.

Urukiko rwanzuye ko Depite Bobi Wine azaburanishwa mu rukiko rwa Gisivili n’abandi baregwa ibyaha bifitanye isano n’ibye.

Nyuma y’uyu mwanzuro, Bobi Wine yagaragaye amarira amuzenga mu maso ndetse yihanagura.

Bobi Wine ugaragara ko yababajwe yahagurutse mu ntebe ashinyiriza. Yahise asohorwa mu rukiko asindagizwa n’abantu benshi bari bamugaragiye, yishingikirije imbago.

Umunyamategeko wa Bobi Wine, Medard Ssegoona, yatangaje ko bagiye guhita berekeza mu rukiko aho ategerejwe.

Yagize ati “Bamenyesheje ko twerekeje mu rukiko ahaburanishirizwa ibyaha akukiranyweho (Bobi Wine). Uburyo ameze ntabwo tugomba guhangana na bo, tuzarwana mu rukiko nkuko twabikoze hano. Nabwiwe ko uri mu maboko y’inzego z’umutekano. Bambwiye ko dukoresha iyi modoka (atunga agatoki iya polisi).”

Ku wa 13 Kanama nibwo Bobi Wine n’abandi badepite barimo Francis Zaake batawe muri yombi, bashinjwa ibyaha birimo gutunga imbunda mu buryo bunyuranyije n’amategeko.

Ifungwa rya Bobi Wine ryakurikiwe n’imyigaragambyo y’abaturage bavugaga ko we na bagenzi be bakorerwa iyicarubozo.

Igisirikare cya leta cyakoresheje amasasu mu gutatanya abigaragambya, umuturage umwe arapfa.

Bobi Wine ashinjwa uruhare mu kumena ibirahuri by’imodoka ya Museveni.

Yatangiye guhangana na Perezida Museveni mu buryo bweruye kuva muri Nyakanga 2017 ubwo yinjiraga mu Nteko Ishinga Amategeko, na mbere y’aho ari muri bake batinyukaga kuvuga byeruye ko hakenewe impinduka mu butegetsi bwa Museveni.

Mu minsi yashize yasohoye indirimbo yise ‘Freedom’ yamagana mu buryo bweruye ihindurwa ry’Itegeko Nshinga hakavanwamo imyaka ntarengwa irebwaho ku wemerewe kuba Perezida wa Uganda.

Iri hindurwa ryatumye Museveni [wafashe ubutegetsi mu 1986] abona uburyo bwo kuzakomeza kuyobora kugeza mu 2021.

Depite Robert Kyagulanyi uzwi nka Bobi Wine (hagati) yasohotse mu Rukiko rwa Gisirikare i Gulu atwawe mu maboko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza