00:00:00 IGIHE NETWORK KN KINYARWANDA EN ENGLISH FR FRANCAIS

Bashir ashobora guhabwa igihano cy’urupfu

Yanditswe na IGIHE
Kuya 22 Ukuboza 2022 saa 08:21
Yasuwe :

Omar al-Bashir wahoze ayobora Sudan yemeye uruhare rwe mu ihirikwa ry’ubutegetsi bwa Minisitiri w’Intebe, Sadiq al-Mahdi mu 1989, ryasize ari we uyoboye iki gihugu kugeza mu 2019, bikaba bishobora gutuma ahabwa igihano cy’urupfu.

Icyakora yahakanye uruhare urwo ari rwo rwose rw’abasivili n’abasirikare bo mu kanama kaharaniraga impinduka mu gutegura no gushyira mu bikorwa ihirikwa ry’ubutegetsi.

Bashir ufungiwe ibyaha bya ruswa, kuwa Kabiri w’iki cyumweru ari kumwe n’abandi basirikare 15, abasivili umunani bo mu ishyaka rye rya kiyisilamu bitabye urukiko rudasanzwe kugira ngo biregure ku byaha byo guhirika ubutegetsi mu 1989.

Imbere y’urukiko, Bashir yagize ati “Mpagaze imbere y’uru rukiko kandi ndavugana ishema n’agaciro ko ndi umuyobozi w’impinduramatwara kandi ndirengera umutwaro w’ibyabaye byose mu 1989”.

Yakomeje avuga ko nta musivili wigeze afasha abasirikare guhirika ubutegetsi kuko nta bufasha bwabo bari bakeneye. Guhirika ubutegetsi kandi ngo byatewe n’ubuzima bubi abasirikare bari babayemo.

Bashir kandi yagaragaje uruhare yagize mu kubaka igihugu yaba mu bikorwaremezo by’imihanda, ibiraro n’ibindi yakoze mu kugeza amashanyarazi ku baturage benshi.

Ati “Twayoboye igihugu imyaka irenga 10 dufite ingengo y’imari iri munsi ya miliyari y’amadolari ariko ntibyatubujije kugera ku majyambere n’ibyiza byinshi. Ntabwo twari dufite urukundo rw’ubutegetsi ahubwo twakoreye abaturage ibyo bari bakwiriye”.

Abasesenguzi berekana ko ibyo Bashir yavuze mu rukiko byo kwirengera ibyaha bishinjwa ishyaka rye bigamije guhanagura icyasha ku bari bakomeye mu butegetsi bwe no kubaharurira inzira yabagarura ku ruhando rwa politiki.

Amategeko ya Sudan ateganya ko umuntu ashobora guhabwa igihano cy’urupfu iyo ahamijwe ibyaha birimo kutubahiriza itegeko nshinga agahirika ubutegetsi bwatowe. Icyakora, ubungubu uhamijwe icyaha gihanishwa igihano cy’urupfu amara ubuzima bwe bwose mu nzu zagenewe abashaje aho kumunyonga nk’uko byagendaga mu myaka irenga 70 ishize.

Bashir ashobora guhabwa igihano cy’urupfu nyuma yo kwemera ko yahiritse ubutegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .