AU yokejwe igitutu nyuma yo kwirukana umudipolomate wayo muri Amerika

Yanditswe na Bukuru JC
Kuya 14 Ukwakira 2019 saa 11:37
Yasuwe :
0 0

Komisiyo y’Umuryango wa Afurika yunze Ubumwe (AU), urimo kotswa igitutu nyuma yo kwirukana umudipolomate wayo muri Leta zunze Ubumwe za Amerika, Dr Arikana Chihombori-Quao, none ukaba usabwa kumusubiza mu nshingano ze.

Ubusabe burimo gucishwa mu buryo bw’ikoranabuhanga burasaba ko Dr Arikana Chihombori-Quao, asubizwa mu kazi ke ndetse bugasaba ko Perezida w’iyi komisiyo Moussa Faki Mahamat yegura.

Dr Chihombori-Quao, muri Kamena 2019, mu biganiro byanyuze kuri televiziyo yagarutse ku masezerano ameze nk’ubukoloni bukomeje.

Uyu mudipolomate ukomoka muri Zimbabwe yagaragaje ukutishimira uburyo ubukoloni bw’u Bufaransa bukomeje mu bihugu 14 bya Afurika. Yanashinjwe kandi kuba yarakunze kurangwa n’imyitwarire nk’iyo kuva yajya muri uyu mwanya mu myaka ibiri yari awumazeho.

Mu ibaruwa Moussa Faki Mahamat yamwandikiye kuwa 7 Ukwakira, yagize ati “Nishimiye kukumenyesha ko bigendanye n’amategeko n’amabwiriza bigenga ishyirwaho ryawe nk’uhagarariye AU muri Amerika i Washington DC, mfashe icyemezo cyo gusesa amasezerano yawe muri ubwo bushobozi bikazatangira kubahirizwa kuwa 1 Ugushyingo 2019”.

Iyi baruwa ishimira Dr Arikana ntabwo yerekana impamvu zatumye akurwa mu mirimo ye. Uyu mugore abinyujije ku mbuga nkoranyambaga yanditse ndetse anashyiraho amashusho avuga ko yirukanywe bitewe n’umurongo we wo kurwanya u Bufaransa n’abandi bitwara nk’abakoloni.

Ihuriro rya Diaspora Nyafurika mu gitondo cyo kuri uyu wa Mbere ryari rimaze gukusanya ubusabe burenga 10 000 bwo gusubiza Dr Arikana mu mirimo ye.

Ubwo busabe bushingiye ku bibazo bigira biti “kuki yirukanywe, ninde wungukira mu kumwirukana, ese abakuru b’ibihugu na za guverinoma ba Afurika barabajijwe, ninde wabisabye? Ni Afurika n’abaturage bayo bahura n’ingaruka zo gusuzugurirwa mu bukoloni bushya?.

Bivugwa kandi i Washington, abayobozi bo muri Minisiteri y’ububanyi n’amahanga ya Amerika batishimiye ukwirukanwa kwe.

Mbere yo kugirwa ambasaderi wa AU muri Amerika Dr. Arikana Chihombori-Quao, yari umuganga n’impirimbanyi. Ni ikiragano cya mbere cy’abimukira bagiye muri Amerika bavuye muri Zimbabwe ndetse akaba n’umuyobozi wa Bell Family Medical Centers muri Amerika ari nawe wawushinze.

Icyemezo cyo kwirukana Dr Arikana cyafashwe nyuma y’uko Faki Mahamat ahuye na Perezida Emmanuel Macron w’u Bufaransa.

Dr Arikana Chihombori-Quao wirukanywe na AU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza