AU yasobanuye ihagarikwa ry’uwari Ambasaderi wayo muri Amerika ryahujwe n’uko yanenze u Bufaransa

Yanditswe na IGIHE
Kuya 15 Ukwakira 2019 saa 09:07
Yasuwe :
0 0

Perezida wa Komisiyo y’Umuryango wa Afurika yunze Ubumwe, AU, Moussa Faki Mahamat, yavuze ko ihagarikwa ry’umunya-Zimbabwe, Dr Arikana Chihombori-Quao wari ambasaderi wa AU muri Leta Zunze Ubumwe za Amerika, ntaho rihuriye n’ibikomeje gutangazwa ku mbuga nkoranyambaga birimo ko yazize amagambo yavuze anenga u Bufaransa.

Ni inkuru zatangiye nyuma y’uko ku wa 7 Ukwakira, Moussa Faki Mahamat yandikiye Dr Chihombori amumenyesha ko hashingiwe ku mategeko n’amabwiriza agenga ishyirwa mu butumwa rye nk’intumwa ya AU muri Leta Zunze Ubumwe za Amerika, yishimiye kumumenyesha ko “nafashe icyemezo cyo guhagarika amasezerano yawe muri izo nshingano, uhereye ku wa 1 Ugushyingo 2019.”

Muri iyo baruwa anavugamo ko yamaze kumenyesha urwego bireba ngo rukurikirane isozwa ry’ubutumwa bwe bitarenze tariki ya 31 Nzeri.

Ni icyemezo cyanenzwe n’abantu batandukanye, babihuje n’amagambo uyu mugore yari aherutse kuvuga ubwo yanengaga u Bufaransa ko Afurika ikiri mu gihe cy’ubukoloni, kubera uburyo icyo gihugu gikomeje kwitwara ku bihugu byo mu Burengerazuba bwa Afurika, kibivomamo miliyari z’amadolari buri mwaka.

Gusa mu ibaruwa imuhagarika mu nshingano nta mpamvu yatumye uwo mwanzuro ufatwa yavuzwemo. Abantu bakabihuza n’uko u Bufaransa bwaba bwarashyize igitutu kuri AU ngo imwirukane, ibintu byaba ari ikimenyetso kugaragaza ijambo ry’ibihugu bikomeye kuri Afurika.

Mu ibaruwa yashyizweho umukono n’umuvugizi wa Perezida wa AU, Ebba Kalondo, kuri uyu wa Kabiri, yavuze ko ihagarikwa rya Dr Arikana Chihombori-Quao nyuma y’imyaka itatu yari amaze mu nshingano ze, ari igikorwa gisanzwe mu mikorere y’abadipolomate.

Yavuze ko intumwa zoherezwa na AU mu rwego rwa politiki zirimo na Dr Chihombori, zishyirwaho mu burenganzira busesuye n’urwego rubashyiraho, ari narwo rugena igihe ubutumwa bushobora kumara.

Yakomeje ati “Dr Chihombori nta cyemezo yafatiwe hashingiwe ku mvugo ze izo ari zo zose mu myaka itatu yari amaze ndetse nta n’igihe komisiyo yatekereje kubikora. Ahubwo Dr Chihombori yakomeje gutanga ibitekerezo bye mu ruhame nta bwoba cyangwa impungenge zo kuvuga ikintu tunaka.”

“Bityo kuvuga cyangwa kwibwira ko Ambasaderi Chihombori yahagaritswe mu mirimo kubera ibyo yavuze cyangwa ibitekerezo bye mu myaka itatu yari amaze, ntabwo ari ukuri.”

Yavuze ko bamwifuriza amahirwe mu yindi mirimo ndetse ko n’uzamusimbura azubakira ku mirimo myiza yakoze ahagarariye AU muri Amerika.

Dr. Chihombori-Quao yafatwaga nk’umuntu uvugisha ukuri kandi uharanira kubumbira hamwe Abanyafurika baba muri Amerika, hagamijwe ko bashyira hamwe mu kubaka “Afurika Twifuza” ijyanye n’icyerekezo 2063.

Ihagarikwa rye ryatumye imiryango y’Abanyafurika baba mu mahanga itangiza ubusabe bw’uko asubizwa mu nshingano, bumaze gushinywaho n’abantu basaga 27 000.

Dr Arikana Chihombori-Quao yahagaritswe nka ambasaderi wa AU muri Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza