Angola yagaruje miliyari zirenga $5 z’umutungo wari waranyerejwe

Yanditswe na Twarabanye Venuste
Kuya 19 Ukuboza 2019 saa 09:47
Yasuwe :
0 0

Minisitiri w’ubutabera muri Angola, Francisco Queiroz yavuze ko muri uyu mwaka igihugu kimaze kugaruza miliyari zirenga eshanu z’Amadorari ya Amerika zanyerejwe mu isanduku ya leta.

Ayo yagarujwe arimo miliyari eshatu z’amadorari ya Amerika yibwe mu kigega cy’igihugu mu buryo bwa ruswa n’ayakoreshejwe mu nyungu z’abantu bwite nk’uko ibiro ntaramakuru byo muri icyo gihugu, ANGOP byabitangaje.

Queiroz ntabwo yasobanuye byinshi ku buryo uwo mutungo wanyerejwe. Yatangaje ko umutungo wose wanyerejwe uzagaruzwa kandi asaba ibihugu by’amahanga ubufatanye.

Ati “Twemeje ko uwo mutungo w’ingenzi ugomba kugaruzwa ugakoreshwa mu guteza imbere ubuzima bw’abaturage bacu.”

Kurwanya ruswa byashyizwemo imbaraga muri icyo gihugu cya kabiri mu byohereza peteroli idatunganyije mu mahanga kuva mu 2017, ubwo Joao Lourenco yabaga Perezida, asimbuye Jose Eduardo dos Santos.

Aljazeera yatangaje ko Guverinoma ishaka gukuraho ubudahangarwa bw’umuryango w’uwari umukuru w’igihugu, kugaruza umutungo w’igihugu wanyerejwe no kwegurira inganda z’igihugu abikorera.

Amaze kujya ku butegetsi, Lourenco yirukanye umuhungu wa Dos Santos ku mwanya w’ikigega cy’imari y’igihugu n’umukobwa we, Isabel, wayoboraga sosiyete y’igihugu itunganya amavuta ya Sonangol.

Uwo muhungu witwa Jose Filomeno de Sousa, aherutse kugezwa imbere y’ubutabera mu cyumweru gishize ari kumwe n’umukuru wa Banki y’igihugu bashinjwa gukura miliyoni $ 500 mu kigega cy’igihugu bakayohereza kuri Konti y’i Londres.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza