Amerika yafatiye ibihano Visi Perezida wa Sudani y’Epfo

Yanditswe na IGIHE
Kuya 9 Mutarama 2020 saa 09:23
Yasuwe :
0 0

Ikigo gishinzwe ubukungu muri Leta Zunze Ubumwe za Amerika cyafatuiye ibihano Tabn Teng Gai, Visi Perezida wa mbere muri Sudani y’Epfo, mu rwego rwo gushyira igitutu kuri icyo gihugu ngo hashyirweho Guverinoma y’Ubumwe.

Mu itangazo ryashyizwe hanze kuri uyu Gatatu, Amerika ivuga ko Gai yagize uruhare mu bwicanyi bwakorewe abarimo umunyapolitiki utavuga rumwe na Leta Aggrey Idri Ezibon ndetse n’umunyamategeko Dong Samuel Luak, agamije gutera ubwoba abatavuga rumwe na Leta.

Gai yafatiwe ibihano birimo gufatira imitungo ye iri muri Amerika no kubuza abaturage ba Amerika gukorana na we ubucuruzi.

Umuvugizi wa Perezida wa Sudani y’Epfo, Ateny Wek Ateny yabwiye Ibiro Ntaramakuru by’Abongereza, Reuters ko ibihano Gai yafatiwe birarushaho kuzambya ibintu.

Yagize ati “Ni umuntu w’ingenzi muri gahunda yo kugarura amahoro, yakabaye ahubwo ashyigikirwa.”

Gai wahoze ari Guverineri muri Sudani y’Epfo, ni umwe mu bikomerezwa biri muri Guverinoma ya Perezida Salva Kiir.

Yitandukanyije na Riek Machar mu 2016, ayoboka Salva Kiir ari nabwo yagirwaga Visi Perezida. Abari ku ruhande rwa Machar bamufata nk’umugambanyi.

Gai ni umwe mu bayobozi bakomeye b’icyo gihugu Amerika ifatiye ibihano nyuma y’aho mu kwezi gushize abandi baminisitiri babiri bahanwe.

Salva Kiir na Riek Machar utavuga rumwe na Leta basinye amasezerano y’amahoro mu 2018, agamije gushyiraho Guverinoma y’ubumwe yagombaga kujyaho bitarenze mu Ugushyingo umwaka ushize.

Mu gihe itariki ntarengwa yari yegereje, Sudani y’Epfo yatangaje ko gushyiraho Guverinoma ihuriweho byigijwe inyuma ho iminsi 100.

Mu Ugushyingo umwaka ushize, Amerika yahamagaje ambasaderi wayo muri Sudani y’Epfo, ivuga ko ishaka kongera kwiga ku mubano wayo n’icyo gihugu kidashaka gushyiraho Guverinoma ihuriweho.

Mu 2013 nibwo intambara yadutse muri Sudani y’Epfo, hashize imyaka ibiri gusa kibonye ubwigenge. Izo mvururu kugeza ubu zimaze guhitana abasaga ibihumbi 400, abandi bavuye mu byabo.

Gai yafatiwe ibihano birimo gufatira imitungo ye iri muri Amerika no kubuza abaturage ba Amerika gukorana na we ubucuruzi.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .