00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi wa RDC i Paris yahamagajwe ashinjwa kunyereza miliyoni €2,6

Yanditswe na Umwali Zhuri
Kuya 30 Ukuboza 2022 saa 05:20
Yasuwe :

Repubulika Iharanira Demokarasi ya Congo yahamagaje Ambasaderi wayo mu Bufaransa, Isabelle Tshombe, nyuma y’uko bitahuwe ko yagize uruhare mu inyerezwa n’ikoreshwa nabi ry’umutungo wa leta, muri dosiye ibarirwa muri miliyoni 2,6 z’ama-euro.

Raporo ya Minisiteri y’Ububanyi n’Amahanga ivuga ku buryo uyu muyobozi yakoresheje nabi umutungo wa leta, yagiye hanze ku wa 27 Ukuboza.

Minisitiri w’Intebe wungirije akaba na Minisitiri w’Ububanyi n’Amahanga, Christophe Lutundula, yavuze ko uyu mudipolomate yagize uruhare mu inyerezwa rya miliyoni 2,6 z’ama-euro.

Itsinda rya Minisiteri y’Ububanyi n’Amahanga ni ryo ryakoze igenzura muri Ambasade ya RDC i Paris, rireba uburyo ingengo y’imari yayo yakoreshejwe, riza gusangamo ikibazo.

Raporo y’iryo tsinda igaragaza ko nyuma yo kugenzura, ryaje gusanga hari amafaranga yaburiwe irengero guhera muri Mutarama kugera mu Ugushyingo angana n’ama-euro 1.759.193,17.

Ni amafaranga arimo ay’ikiguzi Abanye-Congo bagiye bishyura bashaka kugura za pasiporo, aya visa abashaka kujya muri RDC bishyuraga n’andi.

Andi mafaranga yanyerejwe ajyanye n’ibyagiye bigenda ku buzima buhenze abadipolomate ba RDC mu Bufaransa babamo.

Ambasaderi yanenzwe ko yagiye aha uduhimbazamusyi tw’ikirenga abakozi ba Ambasade n’ibindi. Harimo nk’ama-euro ibihumbi 25 bagenerwaga buri kwezi y’icumbi kandi nta burenganzira bwatanzwe na leta.

Isabelle Tshombe yagizwe Ambasaderi wa RDC mu Bufaransa muri Mutarama 2022.

Ambasaderi wa RDC i Paris, Isabelle Tshombe, akurikiranyweho kunyereza umutungo wa leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .