Akababaro kanyu ni ko kacu – Perezida Kagame yifatanya n’Abanyakenya mu gusezera kuri Moi

Yanditswe na Rabbi Malo Umucunguzi
Kuya 11 Gashyantare 2020 saa 03:28
Yasuwe :
0 0

Perezida Paul Kagame yifatanyije n’Abanyakenya mu gusezera bwa nyuma kuri Daniel arap Moi wabaye Perezida wa kabiri wa Kenya, witabye Imana mu cyumweru gishize ku myaka 95.

Kuri uyu wa Kabiri muri Nyayo Stadium mu Murwa Mukuru Nairobi, hakoraniye ibihumbi by’abaturage bitabiriye umuhango wo gusezera bwa nyuma kuri Danie arap Moi, wayoboye Kenya imyaka 24, kuva mu 1978 kugeza mu 2002.

Mu ijambo Perezida Kagame yagejeje ku bihumbi byari bikoraniye muri stade y’igihugu, yavuze ko bitabiriye uyu muhango kubera ubucuti burangwa hagati y’Abanyarwanda n’Abanyakenya, kimwe n’ubuyobozi bw’igihugu byombi, kugira ngo bifatanye bifatanye n’umuryango wa Moi n’abaturage ba Kenya.

Yakomeje ati “Mwakoze kuduha uyu mwanya ngo tubagezeho ubutumwa bubihanganisha, ariko no kugaruka ku bintu bigaragara by’uko iyo abaturage ba Kenya bari mu cyunamo, bigera no ku gihugu cyacu n’abaturage bacu tukifatanya mu kababaro.”

“Kandi n’iyo Abanyakenya bateye intambwe bakagera kuri byinshi, nabyo bitugeraho. Rero perezida, ndabashimira kandi tuzakomeza kwifatanya namwe nk’uko twibuka uyu muyobozi ukomeye, umwe mu bayobozi bakomeye b’iki gihugu gikomeye cya Kenya, kandi Imana imuhe iruhuko ridashira.”

Visi Perezida wa Nigeria, Prof Yemi Osinbanjo, yavuze ko uyu ari umunsi wo kwishimira umugabo ukomeye muri Afurika, wagize uruhare mu kwibohora k’uyu mugabane.

Yavuze ko abantu benshi bazamwibukira ku buryo yafashe iya mbere mu gushyigikira ukwishyira hamwe kw’akarere, ndetse uruhare rwe mu kubaka imiryango ya EAC, COMESA na IGAD, rukomeje kubakirwaho mu kugera ku isoko rusange rya Afurika yose.

Yashimiye Imana ku byo yabashije kugeraho ku bwa Afurika na Kenya, ku buryo yizeye ko Imana yamaze kumwakira mu bayo.

Uwahoze ari Perezida wa Tanzania, Jakaya Kikwete, yavuze ko yababajwe bikomeye n’urupfu rwa Moi, yihanganisha umuryango we na Kenya ku bw’uru rupfu, kuko yamumenye akiri umunyeshuri, atangiye gusoma amakuru yo muri Kenya.

Na nyuma ngo yaje kuba Minisitiri ushinzwe ingufu n’amabuye y’agaciro, Perezida Ali Hassan Mwinyi aza kumutuma mu biganiro na Moi ku rugomero bashakaga kubaka, ngo barebe uko bafatanya.

Yakomeje ati “Maze no kuba Minisitiri w’ububanyi n’amahanga naganiriye na bagenzi banjye, ku ruhande rwa Kenya na nyakwigendera Nicholas Biwott, ku kongera kubyutsa Umuryango wa Afurika y’Iburasirazuba. Moi yari umuyobozi mwiza cyane, yatuyoboye neza twe abaminisitiri afatanyije n’abakuru b’ibihugu bagenzi be, Perezida Mkapa wayoboraga Tanzania icyo gihe na Yoweri Kaguta Museveni wa Uganda.”

“Namwigiyeho byinshi, ibijyanye n’imiyoborere, gusabana n’abantu, kubaha abantu, gukunda abantu, ndumva neza impamvu Abanyakenya bababajwe cyane n’urupfu, rwe, twifatanyije namwe, akababaro kanyu ni nako kacu.”

Perezida Yoweri Kaguta Museveni wa Uganda, yafashe umwanya munini kurusha bagenzi be, kuko yakoresheje iminota isaga umunani.

Yavuze ko umuntu wese agomba gupfa, ahubwo itandukaniro rihari ni icyo buri muntu napfa azasiga inyuma ye, kubera ibikorwa byamuranze akiri muzima. Igihe ngo uzaba warakoze ubusa uzibagirana, cyangwa wibukwe mu bibi gusa.

Yatanze urugero ati “Muri Bibiliya twibukira Pontio Pilato ku gutanga Yesu ngo yicwe. Wowe uzibukwa mu bibi cyangwa mu byiza?”

Yahise agereranya abayobozi b’ibihugu bya Afurika n’abaganga, ku buryo iyo utabashije kuvumbura indwara, udashobora kuyivura bityo igihugu kikajya mu bibazo.

Yakomeje ati “Muri iyi myaka yose nabonye ihinduka ry’abayobozi ba Kenya, ariko Mzee Moi hamwe na Mzee Kenyatta, bari bafite umuti wabashije kuvura ibibazo bya Kenya n’ibya Afurika y’Iburasirazuba.”

Uyu muhango kandi witabiriwe n’abandi bayobozi barimo Perezida wa Repubulika ya Sahrawi, Brahim Ghali; Perezida Sahle-Work Zewde wa Ethiopia na Benjamin Mkapa wahoze ari Perezida wa Tanzania, wari ufite ubutumwa bwa Perezida John Magufuli.

Biteganyijwe ko Moi azashyingurwa mu rugo rwe mu gace ka Kabarak muri Nakuru, kuri uyu wa Gatatu tariki 12 Gashyantare 2020.

Perezida Kagame ageza ubutumwa ku bihumbi by'abaturage muri Nyayo Stadium
Perezida Kagame hamwe n'abandi bayobozi muri Nyayo Stadium
Perezida Kagame yunamira arap Moi muri Nyayo Stadium
Ubwo isanduku irimo umubiri wa Moi yinjizwaga muri stade Nyayo ngo asezeweho bwa nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .