00:00:00 IGIHE NETWORK KN KINYARWANDA EN ENGLISH FR FRANCAIS

Air Tanzania yahagaritse gukoresha indege za Airbus A220

Yanditswe na IGIHE
Kuya 23 Ugushyingo 2022 saa 10:53
Yasuwe :

Ikigo cy’Indege cya Tanzania, Air Tanzania, cyahagaritse gukoresha indege za Airbus A220 kubera ikibazo cya moteri zazo, ubu ikomeje gushaka uburyo bwo kuziba icyo cyuho.

Nation yatangaje ko imwe mu ndege za Air Tanzania yo mu bwoko bwa A220, iheruka gukora urugendo ku wa 3 Mutarama, ubu iparitse ku Kibuga cy’Indege cya Maastricht Aachen mu Buholandi.

Indege ya kabiri yo iparitse ku kibuga cy’indege i Dar es Salaam, nyuma yo gukora urugendo rwa nyuma ku wa 27 Kanama. Indege ya gatatu ya A220 yo ntiheruka gukora urugendo kuva ku wa 5 Ugushyingo.

Iki kibazo ariko si umwihariko wa Air Tanzania, kuko gishingiye ahanini kuri moteri z’izi ndege zikeneye gusimbuzwa cyangwa gusanwa n’uruganda rwazikoze.

Air Tanzania ni yo yazikoresheje mbere muri Afurika, hakurikiraho Air Senegal, Egypt Air na Ibom Air yo muri Nigeria.

Ku wa 10 Ugushyingo, Ikigo gishinzwe ingendo z’indege muri Tanzania, Air Tanzania Company Ltd (ATCL), cyatangaje ko hari ingendo zahungabanye kubera indege za A220 zitari mu mirimo, kubera amabwiriza yatanzwe n’ikigo cyazikoze.

Cyasohoye itangazo kiti "Kubera imbogamizi zihuriweho n’isi yose kuri izi moteri n’ibindi bisabwa bijyanye n’umutekano, twakomeje kugendera ku mabwiriza agamije gutanga serivisi nziza kandi zitekanye. Rimwe na rimwe tuvana indege mu kazi kugira ngo twuzuze ibisabwa n’ikigo gikora moteri."

Air Senegal nayo iheruka kuvana izi ndege za A220 kubera ibyo bibazo.

Kugeza ubu Air Tanzania ifite indege 12 zirimo Bombardier Dash 8-Q300 imwe, Bombardier Dash 8-Q400 eshanu, Airbus A220-300 enye na Boeing 787-8 Dreamliners ebyiri.

Biteganywa ko ziziyongeraho indege eshanu mbere y’impera z’umwaka wa 2023.

Air Tanzania yahagaritse gukoresha indege za Airbus A220

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .