Agasanduku k’umukara k’indege ya Ethiopian iherutse gukora impanuka kajyanywe mu isuzumwa i Paris

Yanditswe na IGIHE
Kuya 14 Werurwe 2019 saa 05:18
Yasuwe :
0 0

Agasanduku k’umukara kakuwe mu ndege ya Boeing 737 MAX iherutse gukorera impanuka muri Ethiopia, kajyanywe mu Bufaransa kuri uyu wa Kane kugira ngo gakorerwe isuzuma rizemeza icyateye iyi mpanuka.

Ikigo gishinzwe gukora iperereza ku bijyanye n’indege za Gisivile mu Bufaransa, BEA, cyatangaje ko cyakiriye aka kagasanduka kabika amakuru yose y’indege, kavuye mu ya Ethiopian Airlines yakoreye impanuka i Addis Ababa ku Cyumweru abantu 157 bose bari bayirimo bakitaba Imana.

Abashakashatsi ba BEA bazagerageza kumva amajwi yafashwe n’aka gasanduku nubwo kangirikiye muri iyi mpanuka.

Aka gasanduku kaba kabitse amakuru ajyanye n’ibyo abapilote bakoze byose ndetse n’uko indege yari imeze mu kirere.

Iri perereza rigiye kuba mu gihe kuri uyu wa Gatatu Leta Zunze Ubumwe za Amerika zatangaje ko hari ibimenyetso bishya bigaragaza ko impanuka y’indege ya Ethiopian ifitanye isano n’iya Lion Air flight yo muri Indonesia yabaye umwaka ushize igahitana abantu 189.

Ibiro bishinzwe iby’indege muri Leta Zunze Ubumwe za Amerika byatangaje ko amakuru yatanzwe na satellite agaragaza ko hakenewe gukorwa iperereza ryimbitse ku isano ryaba riri hagati y’izi mpanuka zombi.

Hagati aho Leta Zunze Ubumwe za Amerika zabaye zifashe umwanzuro wo gukumira indege za Boeing 737 MAX 8 na MAX 9 kugeza igihe hatangiwe andi mabwiriza mashya. Ni mu gihe kandi hari ibindi bihugu na sosiyete z’indege nazo zafashe uyu mwanzuro.

Abantu 157 bari muri iyi ndege bose bitabye Imana
Abashakashatsi batangiye kureba icyateye iyi mpanuka bifashishije agasanduku k'umukara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza